വന്ദേഭാരതിന് ചങ്ങല വലിക്കരുത്; ചങ്ങലയിൽ കുരുങ്ങി നിൽക്കുക മോദിയല്ല, വലിക്കുന്നവർ തന്നെയാകും; വന്ദേഭാരതിനെ പുകഴ്‌ത്തി കവിത എഴുതി പന്ന്യൻ രവീന്ദ്രന്റെ മകൻ

തിരുവനന്തപുരം: കേരളത്തിന് വിഷു കൈനീട്ടമായി വന്ദേഭാരത് ലഭിച്ചതിന്റെ സന്തോഷത്തിലാണ് മുഴുവൻ മലയാളികളും. തിരുവനന്തപുരത്തു നിന്നും കണ്ണൂരിലേയ്‌ക്കാണ് ആദ്യ ട്രെയിൻ അനുവദിച്ചിരിക്കുന്നത്. കെ റെയിലിൽ ആശങ്ക പ്രകടപ്പിച്ചിരുന്ന ജനങ്ങൾക്ക് ഒരാശ്വാസമായി എത്തിയ വന്ദേഭാരതിന് വൻ വരവേൽപ്പാണ് ലഭിച്ചത്. രാഷ്‌ട്രീയത്തിനപ്പുറം വന്ദേഭാരതിനെ അഭിനന്ദിച്ച് നിരവധി പേരാണ് രം​ഗത്തു വരുന്നത്. ഇപ്പോൾ സമൂഹമാദ്ധ്യമങ്ങളിൽ ശ്രദ്ധ നേടുന്നത് സിപിഐ നേതാവ് പന്ന്യൻ രവീന്ദ്രന്റെ മകനും അഭിഭാഷകനുമായ രൂപേഷ് പന്ന്യൻ പങ്കുവെച്ച ഒരു കവിതയാണ്. വന്ദേഭാരതിനെ അഭിനന്ദിച്ചു കൊണ്ടുള്ള കവിത വൈറലാകുകയാണ്.

വന്ദേഭാരത് വരണമെന്ന് പറയാത്ത മലയാളികളുണ്ടാവില്ല. മോദി കൊടിയുയർത്തിയാലും, ഇടതുപക്ഷം വെടിയുതിർത്താലും, വലതുപക്ഷം വാതോരാതെ സംസാരിച്ചാലും പാളത്തിലൂടെ ഓടുന്ന മോടിയുള്ള വണ്ടിയിൽ മലയാളികൾക്ക് കയറണം. പാളം തെറ്റാതെ ഓടാനായി വന്ദേ ഭാരത് കുതിച്ചു നിൽക്കുമ്പോൾ അതിന്റെ കുതിപ്പിനെ ഇല്ലാതാക്കാൻ ചങ്ങല വലിക്കരുത് എന്ന് രൂപേഷ് തന്റെ കവിതയിൽ പറയുന്നു. വന്ദേഭാരതിന്റെ ചങ്ങല വലിച്ചാൽ അതിൽ കുരുങ്ങുന്നത് മോദി അല്ലെന്നും മലയാളികൾ തന്നെയാണെന്നും അദ്ദേഹം ചൂണ്ടിക്കാണിക്കുന്നു.

രൂപേഷ് പന്ന്യൻ പങ്കുവെച്ച കവിത,

‘വന്ദേ ഭാരത് ‘ നോട്
‘വരണ്ടേ ഭാരത് ‘ എന്നു പറയാതെ
‘വരട്ടെ ഭാരത് ‘ എന്നു പറയാത്തവർ മലയാളികളല്ല….
വന്ദേ ഭാരതിന്
മോദി
കൊടിയുയർത്തിയാലും…
ഇടതുപക്ഷം വെടിയുതിർത്താലും…
വലതുപക്ഷം വാതോരാതെ
സംസാരിച്ചാലും…
പാളത്തിലൂടെ ഓടുന്ന
മോടിയുള്ള വണ്ടിയിൽ
പോയി
അപ്പം വിൽക്കാനും
തെക്ക് വടക്കോടാനുമായി
ടിക്കറ്റടുക്കുന്നവരുടെ മനസ്സിൽ എത്തേണ്ട സ്ഥലമല്ലാതെ മറ്റൊന്നുമുണ്ടാകില്ല …
കെ. റെയിൽ
കേരളത്തെ
കേരറ്റ് പോലെ വെട്ടിമുറിക്കാനോങ്ങി നിൽക്കുമ്പോൾ…
വെട്ടാതെ തട്ടാതെ
തൊട്ടു നോവിക്കാതെ
വെയിലത്തും മഴയത്തും
ചീറിയോടാനായി
ട്രാക്കിലാകുന്ന
വന്ദേ ഭാരതി നെ നോക്കി
വരേണ്ട ഭാരത്
എന്നു പാടാതെ
വരട്ടെ ഭാരത് എന്നു പാടിയാലെ ആ പാട്ടിന്റെ ഈണം
യേശുദാസിന്റെ ശബ്ദം പോലെ ശ്രുതിമധുരമാകുകയുള്ളൂ ….
ശ്രുതി തെറ്റുന്ന പാട്ട്
പാളം തെറ്റിയ
തീവണ്ടി പോലെയാണ് ….
പാളം തെറ്റാതെ ഓടാനായി
വന്ദേ ഭാരത്
കുതിച്ചു നിൽക്കുമ്പോൾ
കിതച്ചു കൊണ്ടോടി
ആ കുതിപ്പിന്റെ
ചങ്ങല വലിക്കരുത് …
അങ്ങിനെ വലിക്കുന്ന
ചങ്ങലയിൽ കുരുങ്ങി നിൽക്കുക
മോദിയല്ല…..
വലിക്കുന്നവർ തന്നെയാകും …
വൈകി വന്ന
വന്ദേ ഭാരതിനെ
വരാനെന്തെ വൈകി
എന്ന പരിഭവത്തോടെ…
വാരിയെടുത്ത്
വീട്ടുകാരനാക്കുമ്പോഴെ…
അത്യാവശ്യത്തിന്
ചീറി പായാനായി
വീട്ടിലൊരു
‘ഉസൈൻ ബോൾട്ട് ‘
കൂടിയുണ്ടെന്ന് ആശ്വസിക്കാനാവൂ ..
….വന്ദേ ഭാരത്…