ന്യൂഡൽഹി: ഇന്ത്യ ആതിഥേയത്വം വഹിക്കുന്ന ഷാങ്ഹായ് കോർപ്പറേഷൻ ഓർഗനൈസേഷന്റെ (എസ്സിഒ) അടുത്ത ആഴ്ച നടക്കാനിരിക്കുന്ന യോഗത്തിൽ ചൈനീസ് പ്രതിരോധ മന്ത്രി ലി ഷാങ്ഫുവും റഷ്യൻ പ്രതിരോധമന്ത്രി സെർജി ഷോയിഗുവും പങ്കെടുത്തേക്കും. ഏപ്രിൽ 27,28 തീയതികളിലായി നടക്കുന്ന യോഗത്തിൽ പാകിസ്താൻ ഒഴികെയുള്ള എസ്സിഒ അംഗരാജ്യങ്ങളുടെ പ്രതിരോധ മന്ത്രിമാർ പങ്കെടുക്കും.
പാകിസ്താൻ പ്രതിരോധമന്ത്രി ഖവാജ ആസിഫിന്റെ നേരിട്ടുള്ള പങ്കാളിത്തത്തെ കുറിച്ച് ഇതുവരെ പ്രതികരണങ്ങളൊന്നും പുറത്ത് വന്നിട്ടില്ല. ഭീകരവാദ ഭീഷണിയും അഫ്ഗാനിസ്ഥാനിലെ സാഹചര്യവും ഉൾപ്പെടെ വിവിധ സുരക്ഷ വിഷയങ്ങൾ എസ്സിഒ മന്ത്രിമാരുടെ യോഗത്തിൽ ചർച്ച വിഷയമാകും.
ന്യൂഡൽഹിയിൽ നടക്കുന്ന എസ്സിഒ പ്രതിരോധ മന്ത്രിതല യോഗത്തിന് ശേഷം മെയ് 4,5 തീയതികളിലായി ഗോവയിൽ വിദേശകാര്യ മന്ത്രിതല യോഗവും നടക്കും. പാകിസ്താൻ വിദേശകാര്യമന്ത്രി ബിലാവൽ ഭൂട്ടോ സർദാരി ഉൾപ്പെടെ എല്ലാ എസ്സിഒ അംഗരാജ്യങ്ങളിലെയും വിദേശകാര്യ മന്ത്രിമാർ യോഗത്തിൽ പങ്കെടുക്കും. യോഗത്തിന് ശേഷം ഭൂട്ടോ സർദാരി ഇന്ത്യയിൽ സന്ദർശനം നടത്തുമെന്നും പാകിസ്താൻ നേരത്തെ അറിയിച്ചിരുന്നു.
റഷ്യ, ചൈന, കിർഗിസ് റിപ്പബ്ലിക്, കസാക്കിസ്ഥാൻ, താജിക്കിസ്ഥാൻ, ഉസ്ബെക്കിസ്ഥാൻ എന്നീ രാജ്യങ്ങൾ ചേർന്ന് 2001-ൽ സ്ഥാപിതമായതാണ് എസ്സിഒ. പിന്നീട് ഏറ്റവും വലിയ ട്രാൻസ്-റിജിയണൽ അന്താരാഷ്ട്ര സംഘടനകളിലൊന്നായി വളരുകയായിരുന്നു. 2017ലാണ് ഇന്ത്യയും പാകിസ്താനും സ്ഥിരാംഗങ്ങളായത്.
