സംസ്ഥാനത്തെ ഏറ്റവും വലിയ ഹനുമാൻ പ്രതിമ; പ്രധാനമന്ത്രി ഇന്ന് ഉദ്ഘാടനം നിർവഹിക്കും

തൃശൂർ: പൂങ്കുന്നം പുഷ്പഗിരി സീതാരാമ സ്വാമി ക്ഷേത്രത്തിന് മുന്നിൽ സ്ഥാപിച്ച സംസ്ഥാനത്തെ ഹനുമാൻ പ്രതിമയുടെ ഉദ്ഘാടന കർമ്മം പ്രധാനമന്ത്രി നരേന്ദ്രമോദി നിർവഹിക്കും. സംസ്ഥാനത്തെ ഏറ്റവും വലിയ ഹനുമാൻ പ്രതിമയുടെ ഉദ്ഘാടനമാണ് പ്രധാനമന്ത്രി ഇന്ന് വൈകിട്ട് ആറിന് നിർവഹിക്കുക. ഓൺലൈൻ വഴിയാണ് ഉദ്ഘാടനം നിർവഹിക്കുക. 12 കോടി രൂപ ചെലവിൽ മൂന്ന് ശ്രീകോവിലുകൾ സ്വർണത്തിൽ പൊതിഞ്ഞ് പണി കഴിപ്പിച്ചിരുന്നു. 18 കിലോ സ്വർണത്തിൽ പൊതിഞ്ഞ ശ്രീകോവിലിന്റെ സമർപ്പണവും ഇന്ന് നടക്കും.

സീതാരാമസ്വാമി ക്ഷേത്രത്തിന്റെ മുന്നിൽ 55 അടി ഉയരത്തിലാണ് ഹനുമാൻ പ്രതിമ സ്ഥാപിച്ചിരിക്കുന്നത്. ആന്ധ്രാപ്രദേശിലെ നന്ദ്യാൽ ജില്ലയിലെ അല്ലഗഡയിൽ ശിൽപ്പി വി സുബ്രഹ്മണ്യം ആചാര്യയുടെ നേതൃത്വത്തിലാണ് ശിൽപം തയ്യാറാക്കിയിരിക്കുന്നത്. നാൽപ്പതോളം തൊഴിലാളികൾ ആറ് മാസത്തോളമെടുത്താണ് പ്രതിമയ്‌ക്ക് രൂപം നൽകിയിരിക്കുന്നത്. ഒറ്റക്കല്ലിലായിരുന്നു ശിൽപത്തിന്റെ നിർമ്മാണം നടന്നത്. ഹനുമാൻ പ്രതിമയിൽ ലേസർ ഷോയിൽ ഒരുക്കുന്നുണ്ട്. രാമായണത്തിലെ വിവിധ രംഗങ്ങൾ ഹനുമാൻ ചാലിസ ഓഡിയോ പശ്ചാത്തലത്തിൽ പ്രദർശിപ്പിക്കും. നിരവധി ആളുകളാണ് ക്ഷേത്ര പരിസരത്തേക്ക് എത്തിയിരിക്കുന്നത്.

സീതാരാമസ്വാമിക്ഷേത്രം, ശിവക്ഷേത്രം, അയ്യപ്പക്ഷേത്രം എന്നിവയുടെ ശ്രീകോവിലുകൾ സ്വർണം പൂശിയതിന്റെ സമർപ്പണവും ഇന്ന് നടക്കും. 24 കാരറ്റിൽ 18 കിലോ സ്വർണം ഉപയോഗിച്ചാണ് ശ്രീകോവിലുകൾ പൊതിഞ്ഞിരിക്കുന്നത്. മഹാകുംഭാഭിഷേകത്തോടനുബന്ധിച്ച് ക്ഷേത്രത്തിൽ 20 കോടിയോളം രൂപയുടെ വികസനപ്രവർത്തനങ്ങളാണ് നടപ്പാക്കിയിട്ടുള്ളത്.