തിരുവനന്തപുരം: പൂവച്ചൽ പഞ്ചായത്തിൽ അങ്കണവാടികൾക്കുള്ള സൗജന്യ ടെലിവിഷൻ വിതരണം നടക്കവെ ടിവിയുമായി അഞ്ജാതൻ കടന്നു. ടിവി എടുക്കാൻ വരുന്നതിന്റെയും തിരികെ പോകുന്നതിന്റെയും സിസിടിവി ദൃശ്യങ്ങൾ ക്യാമറയിൽ പതിഞ്ഞെങ്കിലും പ്രതിയെ ഇതുവരെ കണ്ടെത്താനായിട്ടില്ല. കാട്ടാക്കട പോലീസിൽ പരാതി നൽകിയതായി പ്രസിഡന്റ് ടി സനൽകുമാർ പറഞ്ഞു. കെഎസ്എഫ്ഇ വിദ്യാ ജ്യോതി പദ്ധതി പ്രകാരം 4,30,000 രൂപയും പഞ്ചായത്ത് ഫണ്ട് 80,000 രൂപയും വിനിയോഗിച്ച് 5,10,000 രൂപയ്ക്ക് 30 ഇഞ്ച് എൽഇഡി ടെലിവിഷൻ അങ്കണവാടികൾക്ക് നൽകുന്നതിന് കഴിഞ്ഞ ആഴ്ച വാങ്ങി. ഇന്നലെ അങ്കണവാടി ജീവനക്കാർ ടെലിവിഷൻ വാങ്ങുന്നതിനെത്തി റജിസ്റ്ററിൽ ഒപ്പിട്ട ശേഷം പഞ്ചായത്ത് ജീവനക്കാർ ടെലിവിഷൻ എടുത്ത് നൽകുകയായിരുന്നു.
ജീവനക്കാർ ടിവി കൊണ്ടുപോകുന്നതിനിടയിൽ പുറത്തുവെച്ച ടെലിവിഷനിൽ ഒന്നാണ് മോഷണം പോയത്. പാന്റും നീല ഷർട്ടും ധരിച്ച് തോളിൽ ബാഗുമായി ഫോണിൽ സംസാരിച്ചുകൊണ്ട് ഒരാൾ ഓഫീസിലേക്ക് വരുന്നതും തിരികെ കൂളായി ടെലിവിഷനുമെടുത്ത് പുറത്തേക്ക് പോകുന്നതും ദൃശ്യങ്ങളിൽ നിന്ന് വ്യക്തമാണ്. പുറത്തേക്കിറങ്ങിയ ആൾ ബൈക്കിൽ സ്ഥലം വിട്ടതായും പഞ്ചായത്ത് അധികൃതർ പറഞ്ഞു. ടെലിവിഷൻ ഒരു സെന്ററിലേക്ക് നൽകാൻ കഴിയാതെ വന്നതോടെ മാത്രമാണ് മോഷണ വിവരം പുറത്തറിയുന്നത്.
Comments