ഇന്ത്യയിലെ മികച്ച നടിമാരിൽ ഒരാളാണ് അപർണ ബാലമുരളി. മികച്ച അഭിനേത്രി എന്ന നിലയിൽ മാത്രമല്ല തന്റെ അഭിപ്രായങ്ങൾ ഏത് വേദിയിലും വ്യക്തമാക്കുന്ന താരം എന്ന നിലയിലും അപർണ എപ്പോഴും പ്രേക്ഷകശ്രദ്ധ നേടാറുണ്ട്. ഇപ്പോഴിതാ തനിക്ക് കിട്ടിയ ഒരു സ്വപ്ന തുല്യമായ വേദിയെ കുറിച്ച് പറയുകയാണ് അപർണ. ദേശീയ പുരസ്‌കാര അർഹയായ ശേഷം തനിക്ക് കിട്ടിയ ഒരു സ്വപ്ന തുല്യമായ വേദി ആയിരുന്നു കൊച്ചിയിൽ പ്രധാനമന്ത്രി പങ്കെടുത്ത യുവം പരിപാടിയിൽ ലഭിച്ചതെന്ന് അപർണ പറയുന്നു.
പരിപാടിയ്‌ക്ക് ശേഷം അപർണയുടെ രാഷ്‌ട്രീയത്തെ ചോദ്യം ചെയ്തും മറ്റും പലരും രംഗത്ത് എത്തിയിരുന്നു. ഇപ്പോഴിതാ എല്ലാവരുടെയും ചോദ്യങ്ങൾക്ക് മറുപടിയുമായി അപർണ തന്നെ രംഗത്തെത്തിയിരിക്കുകയാണ്. 2018 എന്ന തന്റെ പുതിയ ചിത്രത്തിന്റെ പ്രമോഷൻ വേദിയിലാണ് താരം ഇക്കാര്യം പറഞ്ഞത്.
‘അങ്ങിനെ ഒരു ചടങ്ങിൽ പങ്കെടുത്തതിൽ തെല്ലും കുറ്റബോധം ഇല്ല. ഞാൻ ആ പരിപാടിയിൽ പങ്കെടുത്തതിൽ പലരും വിമർശനങ്ങളുമായി വരുന്നുണ്ട് പരിഹസിക്കുന്നുമുണ്ട്. എന്നാൽ ഇതെല്ലാം മറ്റുള്ളവർ പറയുമ്പോഴാണ് ഞാൻ അറിയുന്നത്. എന്നെ സംബന്ധിച്ച് എല്ലാവർക്കും കിട്ടുന്ന ഒരു അവസരം അല്ല എനിക്ക് കിട്ടിയത്. ഇന്ത്യൻ പ്രധാനമന്ത്രിയ്‌ക്കൊപ്പം ഒരു വേദി പങ്കിടുക എന്നാൽ എന്നെ സംബന്ധിച്ച് അഭിമാനമുള്ള കാര്യമാണ്. ഇനിയൊരിക്കൽ അത് പോലെ ഒരു അവസരം ലഭിയ്‌ക്കും എന്നും വിശ്വസിയ്‌ക്കുന്നില്ല. വളരെ ബഹുമാനത്തോടെയും സന്തോഷത്തോടെയും ആണ് ആ ക്ഷണം ഞാൻ സ്വീകരിച്ചത്. ഞാൻ എന്തിനാണ് ആ പരിപാടിയിൽ പങ്കെടുക്കുന്നത് എന്ന് എനിക്ക് വ്യക്തമായി അറിയാം.
ഇന്ത്യൻ പ്രധാനമന്ത്രിയ്‌ക്കൊപ്പം ഞാൻ ഒരു സ്റ്റേജ് പങ്കിടുന്നു എന്നത് എനിക്കും എന്നെ സ്‌നേഹിക്കുന്നവർക്കും എന്റെ വീട്ടുകാർക്കും അങ്ങേയറ്റം അഭിമാനവും സന്തോഷവും ഉള്ള കാര്യമാണ്. ആ പദവിയ്‌ക്ക് ആണ് പ്രാധാന്യം. എന്ത് തന്നെ പറഞ്ഞാലും വിമർശിച്ചാലും അദ്ദേഹം ആണ് ഇന്ത്യയുടെ പ്രൈംമിനിസ്റ്റർ. ആ പദവിയ്‌ക്ക് ഒരു ബഹുമാനം ഉണ്ട്. പത്ത് വർഷം കഴിഞ്ഞ് തിരിഞ്ഞ് നോക്കിയാലും ആ പരിപാടി എനിക്ക് അഭിമാനം ആണ്’.എന്നായിരുന്നു അപർണയുടെ വാക്കുകൾ.
Comments