ലഹരി ഉപയോഗിക്കുന്നവരുടെ പട്ടിക ‘അമ്മ’യുടെ പക്കലുണ്ടെന്ന് ബാബുരാജ്; വെളിപ്പെടുത്തൽ തള്ളി ഇടവേള ബാബു

എറണാകുളം: ലഹരി ഉപയോഗിക്കുന്ന അഭിനേതാക്കളുടെ പട്ടിക താരസംഘടനയായ അമ്മയുടെ പക്കലുണ്ടെന്ന് ബാബുരാജിന്റെ വെളിപ്പെടുത്തൽ തള്ളി അമ്മ ജനറൽ സെക്രട്ടറി ഇടവേള ബാബു. ‘എന്റെ കൈയിൽ പട്ടികയൊന്നുമില്ല. അമ്മയിലും ഇത് ചർച്ചയായിട്ടില്ല. പക്ഷേ, സിനിമയിൽ ആരൊക്കെയാണ് ലഹരി ഉപയോഗിക്കുന്നതെന്നുള്ളത് പരസ്യമായ രഹസ്യമാണ്’ -അദ്ദേഹം പറഞ്ഞു.

സർക്കാർ സ്വീകരിക്കുന്ന ഏത് നടപടിയോടും സഹകരിക്കും. ജോലി ചെയ്യുമ്പോഴോ ജോലിസ്ഥലത്തോ ലഹരിമരുന്ന് ഉപയോഗിക്കാൻ പാടില്ലെന്നും പൊതിസ്ഥലങ്ങളിൽ മോശമായി പെരുമാറരുതെന്നും അമ്മയുടെ ബൈലോയിൽ ഉൾപ്പെടുത്തിയിട്ടുണ്ട്. പുതിയ അംഗത്വ അപേക്ഷ പരിഗണിക്കുമ്പോൾ ലഹരിമരുന്ന് ഉപയോഗത്തെക്കുറിച്ചുള്ള കർശന പരിശോധനയുണ്ടാകുമെന്നും ഇടവേള ബാബു പറഞ്ഞു.

മയക്കുമരുന്ന് ഉപയോഗിക്കുന്ന സിനിമാതാരങ്ങൾക്കെതിരെ പ്രൊഡ്യൂസേഴ്‌സ് അസോസിയേഷൻ കടുത്ത നടപടികളിലേക്ക് നീങ്ങുകയാണ്. ലഹരി ഉപയോഗിച്ച് സെറ്റിൽ കുഴപ്പങ്ങളുണ്ടാക്കുന്നവരുടെ പട്ടിക അംഗങ്ങളിൽ നിന്ന് ആവശ്യപ്പട്ടതിന് പിന്നാലെ ഇത്തരക്കാരെ അഭിനയിപ്പിക്കുന്നതിലൂടെയുണ്ടാകുന്ന എല്ലാ പ്രശ്‌നങ്ങളുടെയും ഉത്തരവാദിത്വം നിർമാതാവിനായിരിക്കുമെന്ന് അസോസിയേഷൻ മുന്നറിയിപ്പ് നൽകി.