കഞ്ചാവ് സിനിമയിലേയ്‌ക്ക് മാത്രമല്ല വരുന്നത്; ഞാൻ ഭാസിക്കും ഷെയ്നിനും ഒപ്പമാണ്; ലഹരി ഉപയോ​ഗിക്കുന്നത് ഒരാളുടെ വ്യക്തിപരമായ കാര്യമാണ്: നടൻ ജിനു ജോസഫ്

ശ്രീനാഥ് ഭാസിക്കും ഷെയ്ൻ നി​ഗത്തിനൊപ്പമാണ് താൻ എന്ന് നടൻ ജിനു ജോസഫ്. നടന്മാർ കുഴപ്പക്കാരാണെന്ന് തനിക്ക് തോന്നിയിട്ടില്ലെന്നും ഷൂട്ടിം​ഗ് മുടക്കിയതായി ഇതുവരെ അറിയില്ലെന്നും താരം പ്രതികരിച്ചു. കേരളത്തിൽ വരുന്ന കഞ്ചാവ് മുഴുവൻ സിനിമയിലേയ്‌ക്ക് മാത്രമല്ല എത്തുന്നത്. സമൂഹത്തിൽ നടക്കുന്നത് എല്ലാം സിനിമാ രം​ഗത്തും ഉണ്ടാകുമെന്നും ലഹരിക്കേസ് മുഴുവൻ കലാകാരന്മാരുടെ പുറത്തേയ്‌ക്കാണ് ചാർത്തുന്നതെന്നും ജിനു ജോസഫ് പറഞ്ഞു.

‘ജോലി ചെയ്യാൻ പാടില്ല എന്ന് പറയുന്നതിലെ ന്യായം എന്താണെന്ന് എനിക്ക് മനസ്സിലാവുന്നില്ല. ഞാൻ ഷെയ്നിനൊപ്പവരും ഭാസിക്കൊപ്പവും അഭിനയിച്ചിട്ടുണ്ട്. എനിക്ക് ഇതുവരെ ഇവർ പ്രശ്നക്കാരായി തോന്നിയിട്ടില്ല. ഷൂട്ടിം​ഗ് മുടക്കി എന്തെങ്കിലും ഒരു പരിപാടിക്ക് പോകുന്നത് ഞാൻ കണ്ടിട്ടില്ല. ഞാൻ എപ്പോഴും ഭാസിയുടെയും ഷെയ്നിന്റെയും ഭാ​ഗത്താണ്’.

‘സിനിമാ രം​ഗത്തെ ലഹരി വിഷയത്തിൽ എല്ലാ കുറ്റവും ചാരുന്നത് അഭിനേതാക്കളുടെ പുറത്തേയ്‌ക്കാണ്. ബാക്കി അണിയറ പ്രവർത്തകർ ഒന്നും ചെയ്യുന്നില്ലെ എന്ന് അന്വേഷിക്കുന്നില്ലേ. കേരളത്തിലേയ്‌ക്ക് വരുന്ന എല്ലാ കഞ്ചാവും സിനിമ സെറ്റിലേയ്‌ക്കല്ല വരുന്നത്. സമൂഹത്തിൽ നടക്കുന്നത് എല്ലാം സിനിമയിലും നടക്കും. ലഹരി ഉപയോ​ഗിക്കുന്നുണ്ടോ ഇല്ലയോ എന്നത് ഒരാളുടെ പേഴ്സണൽ കാര്യമാണ്’ എന്നും ജിനു ജോസഫ് പറഞ്ഞു.