വേനലിൽ ഷർട്ട് തിരഞ്ഞെടുക്കുമ്പോൾ ശ്രദ്ധ വേണം; ഇളം നിറത്തിലുള്ള ഷർട്ട് അഭികാമ്യം; ജീൻസിനോട് അകലം പാലിക്കാം

വീടിന് അകത്തായാലും പുറത്തായാലും കനത്ത് ചൂടാണ് അനുഭവപ്പെടുന്നത്. അതിനാൽ തന്നെ ധരിക്കുന്ന വസ്ത്രങ്ങളുടെ കാര്യത്തിലും ശ്രദ്ധ അത്യാവശ്യമാണ്. ഇരുചക്രവാഹനനങ്ങളിൽ യാത്ര ചെയ്യുന്നവരെയാണ് ചൂട് കാര്യമായി ബാധിക്കുന്നത്. വേനൽകാലമായാലും പുരുഷൻമാർക്ക് ചെത്തി നടക്കുവാൻ കാലാവസ്ഥയ്‌ക്കിണങ്ങുന്ന ഷർട്ട് തിരഞ്ഞെടുക്കുന്നത് പ്രധാനമാണ്.

ചൂട് അധികം അനുഭവപ്പെടാത്ത, എന്നാൽ സ്‌റ്റൈലിഷായ വസ്ത്രങ്ങൾ വേണമെന്നാണ് എല്ലാവരുടെയും ആഗ്രഹം. കോട്ടൺ, ലിനൻ, സിൽക്ക് ഫ്രാബിക്കുകളിൽ വേനലിലും നിങ്ങൾക്ക് തിളങ്ങാനാകും. നല്ല ഹെവി ലുക്ക് വസ്ത്രങ്ങൾ തെരഞ്ഞെടുക്കുന്നതിനേക്കാൾ നല്ലത് കോട്ടൺ വസ്ത്രമാണ്. ലിനൻ, സിൽക്ക് എന്നീ തുണികളും ചർമ്മത്തിന് ഏറെ അനുയോജ്യമാണ്. വേനൽക്കാലത്ത് വിയർപ്പ് വളരെയധികം കൂടുതൽ ആയിരിക്കും. ഇത്തരം തുണികൾ വിയർപ്പിനെ വലിച്ചെടുക്കാനും ചർമത്തിന് ശരിയായി ശ്വസിക്കാനും സഹായിക്കും. ചൂട് കൂടുന്ന സാഹചര്യത്തിൽ കാഷ്വൽ ലുക്ക് നൽകുന്ന ടീഷർട്ട്, ഷർട്ട് എന്നിവ തെരഞ്ഞെടുക്കാവുന്നതാണ്.

ഷർട്ടിന് ചേരുന്ന തരത്തിലുള്ള പാന്റ്സും അതിനോടൊപ്പം ഇടാവുന്നതാണ്. ജീൻസ് പാന്റുകൾ ഒഴിവാക്കി ഓഫീസ് ലുക്ക് ചീനോസ് പാന്റ്സ് തെരഞ്ഞെടുക്കുന്നതാണ് കൂടുതൽ അഭികാമ്യം.

ഇളം നിറത്തിലുള്ള വസ്ത്രങ്ങളാണ് വേനലിന് യോജിച്ചത്. പ്രത്യേകിച്ചും വെള്ള നിറം. ചൂട് വലിച്ചെടുക്കില്ല എന്നതാണ് കാരണം. കറുപ്പും മറ്റ് കടും നിറങ്ങളും ചൂട് വലിച്ചെടുക്കുന്നവയാണ്. ചൂട് കൂടുതൽ അനുഭവപ്പെടുകയും ചെയ്യും.

ഇറുകിയ ഫിറ്റ് വസ്ത്രങ്ങൾ വേനലിൽ ഒഴിവാക്കാം. ചൂടുകാലത്തിന് യോജിക്കുന്നത് ലൂസ് ഡ്രസ്സുകളാണ്. ജീൻസ് പോലുള്ളവ ഒഴിവാക്കി ബെൽപാന്റ്സ്, റാപ്പ് പാന്റ്സ് പോലുള്ള ലൂസ് പാന്റ്സുകൾ ഉപയോഗിക്കാം. ലൂസ് അല്ലെങ്കിൽ ഓവർ സൈസ് ഷർട്ടുകളും തെരഞ്ഞെടുക്കാം. ഇറുകിയ വസ്ത്രങ്ങൾ ചൂട് കൂട്ടുമെന്ന് മാത്രമല്ല വിയർപ്പ് അടിഞ്ഞ് ചർമത്തിന്റെ ആരോഗ്യത്തെയും ബാധിക്കും.