പല്ല് പൊടിയുന്ന നടൻ ആര്? ടിനി ടോമിന്റെ മൊഴിയെടുക്കാൻ എക്‌സൈസ് വകുപ്പ് തയ്യാറാകാത്തത് എന്തുകൊണ്ടെന്ന് ബി ഉണ്ണികൃഷ്ണൻ

സിനിമാ മേഖലയിലെ ലഹരി ഉപയോഗത്തെ കുറിച്ച് വെളിപ്പെടുത്തലുകൾ നടത്തിയ ടിനി ടോമിന്റെ മൊഴിയെടുക്കാൻ എക്‌സൈസ് വകുപ്പ് തയ്യാറാകാത്തത് എന്തുകൊണ്ടെന്ന് ഫെഫ്ക ജനറൽ സെക്രട്ടറിയും സംവിധായകനുമായ ബി. ഉണ്ണികൃഷ്ണൻ. ടിനി ടോം എക്‌സൈസ് വകുപ്പിന്റെ ബ്രാൻഡ് അംബാസിഡർ ആണെന്ന കാര്യവും അദ്ദേഹം പറഞ്ഞു. സംവിധായകൻ നജീം കോയയുടെ ഹോട്ടൽ മുറിയിൽ റെയ്ഡ് നടത്തിയ എക്‌സൈസ് ഉദ്യോഗസ്ഥരുടെ നടപടിയിൽ ക്രമിനൽ ഗൂഢാലോചന ആരോപിച്ച് നടത്തിയ വാർത്താ സമ്മേളനത്തിൽ പ്രതികരിക്കുകയായിരുന്നു അദ്ദേഹം.

ഈ ഏജൻസി ഇതുവരെ ടിനി ടോമിനെ വിളിപ്പിച്ചോ? നജീം കോയയെ പരിശോധിക്കാൻ തിരുവനന്തപുരത്ത് നിന്ന് ഈരാറ്റുപേട്ട വരെ വരാൻ ഉത്സാഹം കാണിച്ച ഉദ്യോഗസ്ഥർ എന്തുകൊണ്ട് ടിനി ടോമിന്റെ മൊഴി ഇതുവരെ എടുത്തില്ലെന്നും അദ്ദേഹം ചോദിച്ചു. ലഹരിയ്‌ക്ക് അടിമയായി ഒരു നടന്റെ പല്ല് പൊടിഞ്ഞെന്നാണ് പറയുന്നത്. ടിനി ടോം എക്‌സൈസ് വകുപ്പിന്റെ ബ്രാൻഡ് അംബാസിഡറായി വർക്ക് ചെയ്യുന്നുണ്ടെങ്കിൽ ഈ വിഷയം ആദ്യം ചോദിക്കേണ്ടത് ആരാണ്? എക്‌സൈസ് വകുപ്പ് ബ്രാൻഡ് അംബാസിഡറോട് ചോദിക്കേണ്ടതല്ലേ, ആരാണ് ഇതെന്ന് ചോദിക്കേണ്ടെയെന്നും നടപടിയെടുക്കേണ്ടതെന്നും അത് എന്തുകൊണ്ടാണ് ചെയ്യാത്തതെന്നും ബി ഉണ്ണികൃഷ്ണൻ ചോദിച്ചു.

അടുത്തിടെ അമ്പലപ്പുഴയിൽ കേരള സർവകലാശാല യുവജനോത്സവ ഉദ്ഘാടന ചടങ്ങിൽ പങ്കെടുക്കവേയായിരുന്നു ടിനി ടോമിന്റെ പരാമർശം. ഒരു മകനെ എനിക്കുള്ളൂ. ഭയം കാരണം സിനിമയിൽ വിട്ടില്ല. എനിക്കൊപ്പം അഭിനയിച്ച ഒരു നടൻ ലഹരിയ്‌ക്ക് അടിമയാണ്. ആ നടന്റെ പല്ല് പൊടിഞ്ഞ് തുടങ്ങി എന്നാണ് ടിനി ടോം പറഞ്ഞത്.