ന്യൂയോർക്ക്: ഒരുപാട് പ്രത്യേകതകൾ അടങ്ങിയ വാഹനമാണ് സൈക്കിൾ. ലൈസൻസ് ആവശ്യമില്ലാത്ത, ഏതുപ്രായത്തിലുള്ളവർക്കും ഓടിക്കാൻ സാധിക്കുന്ന, ഇന്ധനച്ചിലവില്ലാത്ത അപൂർവ്വം വാഹനങ്ങളിലൊന്ന്. സൈക്കിളിന്റെ ഏറ്റവും വലിയ പ്രത്യേകത അതിന്റെ ചക്രങ്ങൾ തന്നെയാണ്. ഒട്ടുമേ വീതിയില്ലാത്ത ടയറാണ് സൈക്കിളിന് വേണ്ടി ഉപയോഗിക്കുന്നതെങ്കിലും രൂപം കൊണ്ട് വലിപ്പം തോന്നിക്കുന്ന ചക്രമാണ് സൈക്കിളിന്റേത്. മറ്റൊരു തരത്തിൽ പറഞ്ഞാൽ സൈക്കിളിന്റെ ചക്രമാണ് ‘മെയിൻ’. അപ്പോൾ ചക്രമില്ലാത്ത സൈക്കിളാണെങ്കിലോ?
ചക്രമില്ലാതെ സൈക്കിൾ എങ്ങനെ ഓടിക്കാൻ സാധിക്കുമല്ലേ.. കഴിയുമെന്നാണ് സോഷ്യൽ മീഡിയയിൽ വൈറലായ ഈ വീഡിയോ സൂചിപ്പിക്കുന്നത്. യുഎസിലെ ഒരു യൂട്യൂബറാണ് വിചിത്രമായ സൈക്കിൾ തന്റെ കഴിവുകൊണ്ട് സൃഷ്ടിച്ചിരിക്കുന്നത്. എഞ്ചിനീയറിംഗ് അത്ഭുതമെന്ന് വിശേഷിപ്പിക്കാവുന്ന തരത്തിലാണ് ചക്രങ്ങളില്ലാത്ത ഈ സൈക്കിളിന്റെ നിർമ്മാണം. ഒറ്റ നോട്ടത്തിൽ കണ്ടാൽ ടാങ്കുകൾ നീങ്ങുന്നതിന് സമാനമായാണ് സൈക്കിൾ പ്രവർത്തിക്കുന്നത് എന്ന് തോന്നും. ചക്രങ്ങൾക്ക് പകരം ചുറ്റിത്തിരിയുന്ന ബെൽറ്റാണ് സൈക്കിളിന് ഉള്ളത്.
സാധാരണ സൈക്കിൾ ചവിട്ടുന്നതിന് സമാനമായി പെഡലുകളും ഇതിനുണ്ട്. പക്ഷെ വേഗത വളരെ കുറവാണ്. മാത്രമവുമല്ല, ചക്രമില്ലാത്ത ഈ സൈക്കിൾ നിരപ്പായ പ്രതലത്തിൽ മാത്രമേ ഓടിക്കാൻ സാധിക്കൂ. ദൈനംദിന ജീവിതത്തിൽ ഈ സൈക്കിൾ ഉപയോഗപ്രദമാകില്ലെങ്കിലും ചക്രമില്ലാതെ സൈക്കിൾ സംഭവ്യമാകുമോ എന്നുള്ള ചോദ്യത്തിന് ഉത്തരമാണ് യൂട്യൂബർ നൽകുന്നത്.
Comments