കുഞ്ഞൻ ടീമുകളോട് പോലും തോൽവി! ഇന്ത്യ വേദിയാകുന്നത് ചരിത്രത്തിലാദ്യമായി വെസ്റ്റ് ഇൻഡീസ് ഇല്ലാത്ത ലോകകപ്പിന്; ക്രിക്കറ്റ് രാജാക്കൻമാർക്ക് ഇനിയൊരു ഉയിര്‍ത്തെഴുന്നേൽപ്പുണ്ടോ?

രണ്ടുതവണ ലോകചാമ്പ്യൻമാരായ വെസ്റ്റ് ഇൻഡീസ് ഇന്ത്യയിൽ നടക്കുന്ന ഏകദിന ക്രിക്കറ്റ് ലോകകപ്പിന് യോഗ്യതനേടാത്തത് ക്രിക്കറ്റ് ലോകത്തെ അത്ഭുതപ്പെടുത്തി. ഒരു കാലത്ത് ലോക ക്രിക്കറ്റിന്റെ നെറുകയിൽ വാണിരുന്ന കരീബിയൻ കരുത്ത് ഇന്ന് കുഞ്ഞൻ ടീമുകളോട് പോലും മുട്ടിനിൽക്കാനാവാതെ ഏകദിന ലോകകപ്പിൽ യോഗ്യത നേടാനാവാതെ പുറത്താവുമ്പോൾ പഴികേൾക്കുന്നത് വീൻഡീസ് ക്രിക്കറ്റ് ബോർഡും ഒരുപിടി താരങ്ങളുമാണ.്

ക്വാളിഫയർ സൂപ്പർ സിക്സിൽ കരീബിയൻ സംഘം ചരിത്രത്തിലാദ്യമായി സ്‌കോട്ട്ലന്റിനോട് ഏഴുവിക്കറ്റിന് പരാജയപ്പെട്ടാണ് ഏകദിനലോകകപ്പിന് യോഗ്യതനേടാനാകാതെ പുറത്തായത്. ആദ്യം ബാറ്റ് ചെയ്ത വീൻഡീസ് 181 റൺസിൽ പുറത്തായി.മറുപടി ബാറ്റിങിന് ഇറങ്ങിയ സ്‌കോട്‌ലൻഡ് 43.3 ഓവറിൽ മൂന്ന് വിക്കറ്റ് നഷ്ടത്തിൽ 185 റൺസെടുത്താണ് വിജയം തൊട്ടത്. ജയത്തോടെ ഫൈനൽ റൗണ്ട് പ്രതീക്ഷകളും സ്‌കോട്ടിഷ് പട ഉയർത്തി.

ആഭ്യന്തര ക്രിക്കറ്റ് ടൂർണമെന്റുകളിലെ പൊന്നുംവിലയുള്ള താരങ്ങളുടെ പേരുകളിൽ കരീബിയൻ സംഘത്തെ കാണാം. ബാറ്റിങ്ങിലും ബോളിങ്ങിലും ഫീൽഡിങ്ങിലും ഗ്രൗണ്ടിലും ഒരുപോലെ തിളങ്ങുന്നവരാണ് വെസ്റ്റ് ഇൻഡീസ് താരങ്ങൾ.എന്നാൽ ഇവരിൽ പലരും രാജ്യാന്തര ക്രിക്കറ്റിലേക്ക് തിരിഞ്ഞുനോക്കാറില്ല. ട്വന്റി20 ലീഗുകൾ ഓടിനടന്നു കളിക്കുന്നതിനിടെ ദേശീയ ടീമിലേക്കുള്ള സിലക്ഷനു പോലും പലരും എത്താറില്ല. ആഭ്യന്തര ലീഗുകളിൽ തിളങ്ങുന്ന താരങ്ങൾ ദേശീയടീമിലേക്കെത്താതതാണ് കരീബിയൻ ക്രിക്കറ്റിന്റെ ദുർബലതയ്‌ക്ക് കാരണം.

ഷായ് ഹോപ്, ജേസൻ മുഹമ്മദ്, റോഷ്ടൻ ചേസ്, ജയ്സൻ ഹോൾഡർ, നിക്കോളാസ് പുരാൻ, കാർലോസ് ബ്രാത്വെയ്റ്റ്, റോവ്മാൻ പവൽ, കയ്റൻ പൊള്ളാർഡ് തുടങ്ങി പത്തോളം താരങ്ങളാണ് കഴിഞ്ഞ 2 വർഷത്തിനുള്ളിൽ വെസ്റ്റിൻഡീസ് ടീമിന്റെ ക്യാപ്റ്റന്മാരായത്. ക്യാപ്റ്റൻസിയിലെ ഈ അസ്ഥിരത ടീം സിലക്ഷനിലും പ്രകടനമാണ്. 3 വർഷത്തിനിടെ തുടർച്ചയായി മൂന്നിൽ അധികം മത്സരങ്ങളിൽ ഒരേ ടീമിനെ ഇറക്കാൻ കഴിഞ്ഞിട്ടില്ല. ഇതെല്ലാം ക്രിക്കറ്റിലെ ഒരുകാലത്തെ രാജാക്കൻമാരുടെ പതനത്തിന് കാരണമായി.

രണ്ട് ട്വൻറി 20 ലോക കിരീടങ്ങൾ ഉയർത്തിയ ഏക ക്യാപ്റ്റനായ സാക്ഷാൽ ഡാരൻ സമി മുഖ്യ പരിശീലകനായിട്ടും ഷായ് ഹോപിനെ പോലൊരു ഏകദിന ഫോർമാറ്റ് സ്‌പെഷ്യലിസ്റ്റ് ക്യാപ്റ്റനായിട്ടും വെസ്റ്റ് ഇൻഡീസിന് ഇന്ത്യൻ ലോകകപ്പിന് ടിക്കറ്റെടുക്കാൻ സാധിക്കാതെ വന്നു. ലോകകപ്പ് യോഗ്യതാ റൗണ്ടിലെ അവസാന മൂന്ന് മത്സരങ്ങളിലും വെസ്റ്റ്ഇൻഡീസ് തോറ്റിരുന്നു.സ്‌കോട്‌ലൻഡിനോട് ഏഴ് വിക്കറ്റിന് പുറമെ നെതർലൻഡിനോട് സൂപ്പർ ഓവറിലും സിംബാബ്വെയോട് 35 റൺസിനും വെസ്റ്റ് ഇൻഡീസ് പരാജയപ്പെടുകയായിരുന്നു.1975, 1979 ലോകകപ്പുകളിലാണ് വെസ്റ്റ് ഇൻഡീസ് കിരീടം നേടിയത്. 48 വർഷത്തെ ടൂർണമെന്റ് ചരിത്രത്തിൽ ആദ്യമായാണ് യോഗ്യത നേടാനാകാതെ ടീം പുറത്താകുന്നത്. ഏകദിനത്തിൽ വിൻഡീസിനെതിരെ സ്‌കോട്ട്‌ലൻഡിന്റെ ആദ്യ ജയം കൂടിയാണിത്.