താരങ്ങള് ഒരോരുത്തരായി കൊഴിഞ്ഞുപോകുന്ന ഇംഗ്ലീഷ് വമ്പന്മാരായ ലിവര്പൂള് വീണ്ടും ഭീതിയില്. ലോകഫുട്ബോളിലെ മികച്ച ഗോള് കീപ്പര്മാരില് ഒരാളായ അലിസണ് ബെക്കറിനെയും മുന്നേറ്റ താരവും ഈജിപ്ഷ്യന് മജീഷ്യനുമായ മൊഹമ്മദ് സലയെയും റാഞ്ചാന് സൗദി നീക്കം നടത്തുന്നതായി വിവരം.സൗദി പ്രൊ ലീഗ് ജേതാക്കളായ അല് ഇത്തിഹാദാണ് സലയ്ക്കായി രംഗത്തുള്ളത്.
ലിവര്പൂള് ഗോള്കീപ്പറിനായി നോട്ടമിടുന്നത് റോണോയുടെ അല്നാസറാണ്. ഈ സമ്മര് ട്രാന്സ്ഫര് വിന്ഡോ അവസാനിക്കും മുമ്പ് അലിസണെ സൈന് ചെയ്യാന് അല് നസര് ആഗ്രഹിക്കുന്നുണ്ട്. ഫൂട്ട് മെര്ക്കാറ്റോ ആണ് അലിസണായി അല് നസര് വമ്പന് ഓഫര് മുന്നില് വെച്ചതായി റിപ്പോര്ട്ട് ചെയ്യുന്നത്. എന്നാല് ലിവര്പൂള് അലിസണെ വില്ക്കാനുള്ള സാദ്ധ്യത വിരളമാണ്.ഇതിനകം ലിവര്പൂളിന് ഹെന്ഡേഴ്സണ്, ഫബിനോ എന്നിവരെ സൗദി ക്ലബുകള്ക്ക് റാഞ്ചിയിരുന്നു.
സലയ്ക്ക് പ്രതിവര്ഷം 60 ദശലക്ഷം യൂറോ ഇത്തിഹാദ് വാഗ്ദാനം ചെയ്തുകഴിഞ്ഞതായി ഖത്തറിലെ അല്കാസ് ചാനല് റിപ്പോര്ട്ട് ചെയ്യുന്നു. സൗദി പ്രോ ലീഗിലെ നിലവിലെ ജേതാക്കളായ അല് ഇത്തിഹാദ് ഇതിനോടകം തന്നെ കരീം ബെന്സേമ, എന്കോളോ കാന്റെ, ഫാബീഞ്ഞോ, തിയാഗോ ജോട്ട തുടങ്ങിയ താരങ്ങളെ ക്ലബ്ബിലെത്തിച്ചിട്ടുണ്ട്. ഇതില് ഫാബിഞ്ഞോയ്ക്കൊപ്പം നേരത്തെ ഇറ്റാലിയന് സീരി എയില് സലാ ഏറെ കാലം ഒരുമിച്ച് കളിച്ചിട്ടുണ്ട്.
സെക്കോ ഫൊഫാന, സാഡിയോ മാനെ, ടെല്ലസ്, ക്രിസ്റ്റ്യാനോ റൊണാള്ഡോ എന്നിവരെ ഇതിനകം സൈന് ചെയ്തിട്ടുള്ള അല്-നാസര് പ്രതിരോധത്തിലേക്ക് ബാഴ്സലോണ താരം ലെങ്ലെയെ എത്തിക്കാന് ശ്രമിക്കുന്നുമുണ്ട്.കഴിഞ്ഞ ദിവസം ചെല്സിക്കെതിരായ പ്രീമിയര് ലീഗ് സീസണിലെ ആദ്യ മത്സരത്തില് സലയും കോച്ചും തമ്മിലുള്ള പ്രശ്നങ്ങള് മറനീക്കി പുറത്തുവന്നിരുന്നു. മത്സരത്തില് 77-ാം മിനിട്ടിലാണ് ലിവര്പൂള് കോച്ച് യോര്ഗന് ക്ലോപ്പ് മൊഹമ്മദ് സലയെ പകരക്കാരനാക്കി കളത്തില് ഇറക്കിയത്. വെറും 13 മിനിട്ട് മാത്രമാണ് താരം കളത്തിലുണ്ടായിരുന്നത്.
