ഇടുക്കി: ഓണക്കാലത്ത് ലഹരിക്കടത്ത് വ്യാപകമാകുമെന്നതിന്റെ പശ്ചാത്തലത്തിൽ ആരംഭിച്ച ഓണം സ്പെഷ്യല്‍ ഡ്രൈവിന്റെ ഭഗമായി നടത്തിയത് 492 റെയ്ഡുകള്‍. ഇടുക്കി ജില്ലയില്‍ നടത്തിയ റെയ്ഡുകളിൽ വ്യാജമദ്യവും കഞ്ചാവും മാരകമയക്കുമരുന്നായ എംഡിഎംഎയും പിടികൂടി എക്സൈസ്.പരിശോധനകള്‍ സെപ്തംബര്‍ അഞ്ചു വരെ തുടരുന്നതാണ്.
റെയ്ഡുകളിൽ 58 അബ്കാരി കേസുകളും 46 എന്‍ഡിപിഎസ് കേസുകളും എടുത്തതായി എക്സൈസ് വകുപ്പ് അറിയിച്ചു. 151 ലിറ്റര്‍ മദ്യം, 78 ലിറ്റര്‍ ചാരായം, 11.75 ലിറ്റര്‍ വ്യാജ മദ്യം, ഏഴ് ലിറ്റര്‍ ബിയര്‍, 1350 ലിറ്റര്‍ കോട, ഒന്‍പത് കിലോ കഞ്ചാവ്, നാല് കഞ്ചാവ് ചെടികള്‍, 2.164 മില്ലി ഗ്രാം എംഡിഎംഎ തുുടങ്ങിയവ പിടിച്ചെടുത്തു. ആറ് വാഹനങ്ങളും കസ്റ്റഡിയിലെടുത്തു.
പോലീസ്, വനം, റവന്യൂ വകുപ്പുകളുമായി സംയുക്തമായാണ് ഓരോ റേഞ്ചിലും റെയ്ഡുകള്‍ നടത്തുന്നത്. തമിഴ്നാട് പോലീസ്, ഫോറസ്റ്റ് വകുപ്പുകള്‍, തമിഴ്നാട് പ്രോഹിബിഷന്‍ ആന്റ് എന്‍ഫോഴ്സ്മെന്റ് വിംഗ് എന്നിവരുമായി ചേര്‍ന്ന് ചെക്ക്പോസ്റ്റുകളിലും അതിര്‍ത്തി മേഖലകളിലും സംയുക്ത പരിശോധനകള്‍ നടത്തുകയാണ് ചെയ്യുന്നത്. ഇതിലൂടെ കുറ്റകൃത്യങ്ങള്‍ കണ്ടെത്തി തടയാനും വിവരങ്ങള്‍ കൈമാറുന്നതിനും ആവശ്യമായ നടപടികള്‍ സ്വീകരിച്ചതായി ഇടുക്കി ഡെപ്യുട്ടി എക്സൈസ് കമ്മീഷണര്‍ അറിയിച്ചു.
Comments