ആർആർആറിന്റെ ആഗോള വിജയത്തിന് ശേഷം മറ്റൊരു മാസ്റ്റർപീസുമായി എസ്എസ് രാജമൗലി എത്തുന്നു. ഇന്ത്യൻ സിനിമയുടെ പിതാവ് എന്ന് അറിയപ്പെടുന്ന ദാദാസാഹിബ് ഫാൽക്കെയുടെ ജീവിതമാണ് വെള്ളിത്തരയിൽ അവതരിപ്പിക്കുന്നത്. ‘മെയ്ഡ് ഇൻ ഇന്ത്യ’ എന്ന് പേരിട്ടിരിക്കുന്ന ചിത്രത്തിന്റെ ടൈറ്റിൽ എസ്എസ് രാജമൗലി പ്രഖ്യാപിച്ചു. ദേശീയ പുരസ്‌കാര ജേതാവ് നിതിൻ കാക്കർ ആണ് ചിത്രം സംവിധാനം ചെയ്യുന്നത്. എക്‌സ് പ്ലാറ്റ് ഫോമിൽ സിനിമയുടെ ടീസർ രാജമൗലി പങ്കുവെച്ചിട്ടുണ്ട്. രാജമൗലിയുടെ മകൻ എസ് എസ് കാർത്തികേയയും വരുൺ ഗുപ്തയും ചേർന്നാണ് ബയോപിക് നിർമ്മിക്കുന്നത്.
ആർആർആർ, ബാഹുബലി തുടങ്ങിയ വലിയ സിനിമകളിലൂടെ പ്രേക്ഷകരെ വിസ്മയിപ്പിച്ച സംവിധായകനാണ് രാജമൗലി. റിപ്പോർട്ട് അനുസരിച്ച്, ഇന്ത്യൻ സിനിമയുടെ ഉദയവും പിന്നിട്ട പടവുകളും ചിത്രം വരച്ചുകാട്ടും. വലിയ ക്യാൻവാസിൽ ഇതിഹാസ സമാനമായാണ് ചിത്രം പുറത്തിറങ്ങുക.
‘സിനിമയെ കുറിച്ചുള്ള ആദ്യം വിവരണം കേട്ടപ്പോൾ തന്നെ ആഴത്തിൽ സ്പർശിച്ചു. ഒരു ബയോപിക് നിർമ്മിക്കുന്നത് തന്നെ കഠിനമാണ്, എന്നാൽ ഇന്ത്യൻ സിനിമയുടെ പിതാവിനെക്കുറിച്ച് എന്നത് അതിലും വെല്ലുവിളിയാണ്. എന്നാൽ ഇന്ത്യക്കാർ അതിന് തയ്യാറാണ്… വളരെയധികം അഭിമാനം, രാജമൗലി ട്വീറ്റ് ചെയ്തു.
അതേസമയം പ്രഭാസിന്റെ കൽക്കി 2898 എഡിയിൽ രാജമൗലി ഒരു അതിഥി വേഷം ചെയ്യാൻ ഒരുങ്ങുന്നതായി വാർത്തകൾ പുറത്ത് വരുന്നുണ്ട്. മുമ്പ് ബാഹുബലിയുടെ ആദ്യഭാഗത്തിൽ രാജമൗലി ഒരു അതിഥി വേഷത്തിൽ എത്തിയിരുന്നു. മാത്രമല്ല, അദ്ദേഹം കുറച്ച് പരസ്യങ്ങളിൽ അഭിനയിക്കുകയും ചെയ്തിട്ടുണ്ട്. എന്നാൽ ‘കൽക്കി 2898 എഡി’യിലെ രാജമൗലിയുടെ അതിഥി വേഷം സംബന്ധിച്ച് സ്ഥിരീകരണം ഇതുവരെ ഉണ്ടായിട്ടില്ല.
Comments