ന്യൂഡൽഹി: ഇന്ത്യയെ ഒരു വികസിത രാഷ്‌ട്രമാക്കി മാറ്റുന്നതിനുള്ള നിയമങ്ങൾ നിർമ്മിക്കുമ്പോൾ അർത്ഥവത്തായതും ക്രിയാത്മകവുമായ സംവാദങ്ങളിൽ ഏർപ്പെടണമെന്ന് പാർലമെന്റ് അംഗങ്ങളോട് ലോക്സഭാ സ്പീക്കർ ഓം ബിർള. രാജ്യത്തെ ജനങ്ങളുടെ സ്വപ്‌നങ്ങളും അഭിലാഷങ്ങളും നിറവേറ്റണമെന്നും അദ്ദേഹം അഭ്യർത്ഥിച്ചു. പാർലമെന്റിന്റെ സെൻട്രൽ ഹാളിൽ നടന്ന ചടങ്ങിൽ ഇന്ത്യൻ പാർലമെന്റിന്റെ സമ്പന്നമായ പൈതൃകത്തെ അനുസ്മരിച്ചുകൊണ്ട് സംസാരിക്കുകയായിരുന്നു സ്പീക്കർ.
‘2047 ഓടെ ഇന്ത്യയെ ഒരു വികസിത രാഷ്‌ട്രമാക്കുകയെന്ന സ്വപ്‌നം സാക്ഷാത്കരിക്കും. ഈ സ്വപ്‌നത്തിൽ ജനങ്ങളുടെ അഭിലാഷങ്ങൾ നിറവേറ്റാനും അവരുടെ പ്രതീക്ഷകൾ സഫലമാക്കാനും നാം അവരെ സഹായിക്കണം. നമ്മുടെ രാജ്യത്തെ കൂടുതൽ സമൃദ്ധമാക്കുന്നതിനും പാർലമെന്റിൽ അർത്ഥവത്തായ ചർച്ചകൾ ഉണ്ടാകണം. 75 വർഷത്തെ പാർലമെന്ററി ജനാധിപത്യ യാത്രയിൽ വിപ്ലവകരമായ നിരവധി മാറ്റങ്ങൾക്ക് നാം സാക്ഷ്യം വഹിച്ചു’ അദ്ദേഹം വ്യക്തമാക്കി.
‘ഇന്ന് രാജ്യത്തെ ജനങ്ങൾ ഒരു പുതിയ ഇന്ത്യയ്‌ക്കായി ആഗ്രഹിക്കുകയാണ്. ജനങ്ങളുടെ പ്രതീക്ഷകളും അഭിലാഷങ്ങളും സാക്ഷാത്കരിക്കേണ്ടത് നമ്മുടെ ഉത്തരവാദിത്തമാണ്. പുതിയ പാർലമെന്ററി ജനാധിപത്യത്തിലെ കൂട്ടായ ചർച്ചയിലൂടെയും കഠിനാദ്ധ്വാനത്തിലൂടെയും രാജ്യത്തിന്റെ മുഴുവൻ പങ്കാളിത്തത്തോടെയും ഈ അഭിലാഷങ്ങൾ നിറവേറ്റുക എന്നതാണ് ഞങ്ങളുടെ ദൃഢനിശ്ചയം. ഭരണഘടനയുടെ രൂപീകരണവുമായി ബന്ധപ്പെട്ട സുപ്രധാനവും ചരിത്രപരവുമായ നിരവധി തീരുമാനങ്ങൾക്ക് ഈ പാർലമെന്റ് സാക്ഷിയായി’അദ്ദേഹം പറഞ്ഞു.
Comments