വാഷിംഗ്ടൺ: അമേരിക്കൻ പ്രസിഡന്റ് ജോ ബൈഡന്റെ വളർത്തുനായ വീണ്ടും ജീവനക്കാരനെ കടിച്ചു. ഇത്തവണ യുഎസ് രഹസ്യ സർവ്വീസ് ഏജന്റിനായിരുന്നു ജർമ്മൻ ഷെപ്പേർഡ് വിഭാഗത്തിൽപെട്ട കമാൻഡർ എന്ന വളർത്തു നായയുടെ കടിയേറ്റത്. കഴിഞ്ഞ ദിവസം രാത്രി 8 മണിക്കായിരുന്നു സംഭവം. പരിക്കേറ്റയാളെ ചികിത്സിച്ചുവെന്നും ആരോഗ്യനില തൃപ്തികരമാണെന്നും കമ്മ്യൂണിക്കേഷൻ ചീഫ് ആന്റണി ഗുഗ്ലിയൽമി അറിയിച്ചു.
ഫസ്റ്റ് ഡോഗ് എന്ന് വിശേഷിപ്പിക്കുന്ന നായയ്‌ക്ക് 2 വയസ് മാത്രമാണ് പ്രായം. 11-ാം തവണയാണ് വൈറ്റ് ഹൗസിലെ ഈ ജർമ്മൻ ഷെപ്പേർഡ് നായ മറ്റൊരാളെ ആക്രമിക്കുന്നത്. വൈറ്റ് ഹൗസ് കുടുംബത്തിലെ രണ്ട് ജർമ്മൻ ഷെപ്പേർഡുകളിൽ ഏറ്റവും ഇളയവനാണ് കമാൻഡർ. വീടിനുള്ളിൽ തന്നെ കഴിയേണ്ടി വരുന്നതിന്റെ സമ്മർദ്ദം മൂലമാണ് നായ മറ്റുള്ളവരെ ആക്രമിക്കുന്നതെന്ന വിചിത്ര പ്രസ്താവനയും ഇതിനോടകം പുറത്തുവന്നിട്ടുണ്ട്. വൈറ്റ് ഹൗസ് പ്രസ് സെക്രട്ടറി കരീൻ ജീൻ പിയറി ആണ് ഇത്തരത്തിൽ പ്രതികരിച്ചത്.
