രാജ്യത്ത് സ്‌റ്റേറ്റ് ബാങ്ക് ഓഫ് ഇന്ത്യ ഭവന വായ്പ സംബന്ധിച്ച ഇളവുകൾ പ്രഖ്യാപിച്ചു. 65 ബേസിസ് പോയിന്റ് വരെ കിഴിവാണ് എസ്ബിഐ പ്രഖ്യാപിച്ചിരിക്കുന്നത്. 2023 ഡിസംബർ 31 വരെയാകും ഇളവുകൾ ലഭിക്കുക. വായ്പ എടുക്കുന്നവരുടെ ക്രെഡിറ്റ് സ്‌കോറിനെ അടിസ്ഥാനമാക്കിയാകും പലിശയിൽ ഇളവ് ലഭിക്കുന്നത്. ഉപഭോക്താവിന്റെ ക്രെഡിറ്റ് സ്‌കോർ 750 മുതൽ 800 വരെയും ഇതിന് മുകളിലുമാണെങ്കിൽ ഡിസംബർ 31 വരെ ഭവന വായ്പാ പലിശ നിരക്ക് 8.60 ശതമാനമാണ്. ഇതിലൂടെ ലഭ്യമാകുന്നത് 55 ബിപിഎസ് ഇളവാണ്.
ക്രെഡിറ്റ് സ്‌കോർ 700 മുതൽ 749 വരെ ആണെങ്കിൽ ഭവനവായ്പകൾക്ക് 0.65 ശതമാനം ഇളവാകും ലഭിക്കുക. ഈ ക്രെഡിറ്റ് സ്‌കോർ ഉള്ള ഉപഭോക്താക്കൾക്ക് ഡിസംബർ 31 വരെ പലിശ നിരക്ക് 8.7 ശതമാനമാണ്. എന്നാൽ ക്രെഡിറ്റ് സ്‌കോർ 550-699 വരെയാണെങ്കിൽ ഉപഭോക്താക്കൾക്ക് ബാങ്ക് ഇളുവകൾ നൽകില്ല. ഈ ക്രെഡിറ്റ് സ്‌കോറുള്ളവരിൽ നിന്നും 9.45 ശതമാനം, 9.65 ശതമാനം എന്നിങ്ങനെയാകും പലിശ നിരക്ക് ഈടാക്കുക. ക്രെഡിറ്റ് സ്‌കോർ 151 മുതൽ 200 വരെയാണെങ്കിൽ 65 ബിപിഎസ് ഇളവാകും ലഭിക്കുക. ഈ വിഭാഗത്തിൽ ഉള്ളവർക്ക് നിരക്ക് 8.7 ശതമാനമാണ്.
ഇതിന് പുറമേ കാർ ലോണുകൾക്കും എസ്ബിഐ ഇളവുകൾ നൽകുന്നുണ്ട്. ഈ കാലയളവിൽ കാർ ലോണുകൾക്ക് പ്രോസസിംഗ് ഫീ ഈടാക്കില്ല. 2024 ജനുവരി 31 വരെയാണ് ഓഫർ ലഭ്യമാകുകയെന്ന് എസ്ബിഐ പറയുന്നു. ക്രെഡിറ്റ് സ്‌കോറുകൾ അടിസ്ഥാനമാക്കിയാകും ഇതും അനുവദിക്കുക. കാർ ലോണുകൾക്ക് 8.8 ശതമാനം മുതൽ 9.7 ശതമാനം വരെയാകും പലിശ ഈടാക്കുക.
