തൊടുന്നതെല്ലാം പൊന്നാക്കുന്ന സംവിധായകനാണ് ലിജോ ജോസ് പെല്ലിശ്ശേരി. സാമ്പത്തിക വിജയം കൈവരിക്കുന്ന ചിത്രങ്ങളെക്കാൾ കലാമൂല്യമുള്ള ചിത്രങ്ങൾക്കാണ് അദ്ദേഹം പ്രാധാന്യം നൽകുന്നത്. ജല്ലിക്കെട്ടടക്കമുള്ള ചിത്രങ്ങൾ അതിന് ഉദാഹരണമാണ്. മമ്മൂട്ടി നായകനായ നൻപകൽ നേരത്ത് മയക്കമാണ് അദ്ദേഹത്തിന്റെ ഒടുവിൽ പുറത്തുവന്ന ചിത്രം. കഴിഞ്ഞ വർഷം മികച്ച നടനുള്ള സംസ്ഥാന അവാർഡ് മമ്മൂട്ടിയ്‌ക്ക് നേടിക്കൊടുത്ത ചിത്രം കൂടിയായിരുന്നു നൻപകൽ നേരത്ത് മയക്കം.
ഇപ്പോഴിതാ ലിജോ ജോസ് പെല്ലിശ്ശേരിയുടെ പുതിയ ചിത്രത്തെ കുറിച്ചുള്ള വാർത്തകളാണ് പുറത്ത് വരുന്നത്. അടുത്ത ചിത്രം മഞ്ജു വാര്യർക്കും കുഞ്ചാക്കോ ബോബനും ഒപ്പമാണെന്നാണ് റിപ്പോർട്ടുകൾ. ഇരുവരും ആദ്യമായാണ് ലിജോ ജോസ് ചിത്രത്തിൽ അഭിനയിക്കുന്നത്. സിനിമയെ കുറിച്ചുള്ള ഔദ്യോഗിക പ്രഖ്യാപനങ്ങൾ വരും ദിവസങ്ങളിൽ നടക്കും. ഹൗ ഓൾഡ് ആർ യു ആണ് ഇരുവരും ഒന്നിച്ച ആദ്യ ചിത്രം. ത്രില്ലർ ചിത്രം വേട്ട കഴിഞ്ഞ് ഒരു നീണ്ട ഇടവേളയ്‌ക്ക് ശേഷമാണ് ചാക്കോച്ചനും മഞ്ജു വാര്യരും ഒന്നിക്കുന്നത്.
അതേസമയം ആരാധകർ ആകാംക്ഷയോടെ കാത്തിരിക്കുന്ന മലൈക്കോട്ടെ വാലിബനാണ് ലിജോ ജോസ് പെല്ലിശ്ശേരിയുടെ പുറത്തുവരാനിരിക്കുന്ന ചിത്രം. മോഹൻലാലും ലിജോ ജോസും ആദ്യമായി ഒന്നിക്കുന്ന ചിത്രം കൂടിയാണ് വാലിബൻ. 2024 ജനുവരിയിൽ ചിത്രം പ്രദർശനത്തിനെത്തുമെന്നാണ് പ്രതീക്ഷിക്കുന്നത്. രാജസ്ഥാനടക്കം നിരവധി ലൊക്കേഷനുകളിലാണ് വാലിബൻ ചിത്രീകരിച്ചത്.
