ന്യൂഡൽഹി: റെയ്ഡിന് പിന്നാലെ ന്യൂസ് ക്ലിക്ക് സ്ഥാപകനും എഡിറ്ററുമായ പ്രഭീർ പുർകായസ്ഥ അറസ്റ്റിൽ. യുഎപിഎ നിയമപ്രകാരം ഡൽഹി പോലീസാണ് ഇയാളെ അറസ്റ്റ് ചെയ്തത്. ന്യൂസ് പോർട്ടലിന്‍റെ എച്ച് ആർ മേധാവി അമിത് ചക്രവർത്തിയെയും പോലീസ് അറസ്റ്റ് ചെയ്തു. രാജ്യവിരുദ്ധ പ്രവർത്തനങ്ങൾക്കായി ചൈനീസ് ഫണ്ട് സ്വീകരിച്ചതിനെ തുടർന്നാണ് യുഎപിഎ ചുമത്തി കേസെടുക്കുകയും സ്ഥാപനം പൂട്ടി മുദ്രവെക്കുകയും ചെയ്തത്.
ചെവ്വാഴ്ച രാവിലെയാണ് ഏഴ് മാദ്ധ്യമപ്രവർത്തകരുടെ വസതികളിലും ന്യൂസ്‌ക്ലിക്കുമായി ബന്ധപ്പെട്ട സ്ഥലങ്ങളിലും പോലീസ് റെയ്ഡ് നടത്തിയത്. 35 ഇടങ്ങളിലായിരുന്നു പരിശോധന. റെയ്ഡിന്റെ പിന്നാലെയാണ് ഓഫീസ് പൂട്ടി സീൽ ചെയ്തത്. 9 മണിക്കൂറോളമാണ് ഡൽഹി പോലീസിന്റെ പ്രത്യേക സെൽ നടത്തിയ റെയ്ഡ് നീണ്ടു നിന്നത്.
രാത്രിയോട് കൂടിയായിരുന്നു പ്രഭീർ പുർകായസ്ഥയുടെ അറസ്റ്റ്. ചൈനയിൽ നിന്ന് ഫണ്ട് ലഭിക്കുന്നു എന്ന് വിവരം ലഭിച്ചതോടെ ന്യൂസ് ക്ലിക്കിനെതിരെ പോലീസ് കേസെടുത്തിരുന്നു. ഈ ഫണ്ടുപയോഗിച്ച് ചൈനയെ പ്രകീർത്തിക്കുന്ന ലേഖനങ്ങൾ എഴുതുന്നുവെന്നും ഇന്ത്യാ വിരുദ്ധ പ്രവർത്തനങ്ങൾ നടത്തുന്നുവെന്നും ആരോപണമുണ്ട്.
