തിരുവനന്തപുരം: മുതലപ്പൊഴിയിൽ വീണ്ടും അപകടം. വള്ളത്തിലിടിച്ച് പരിക്കേറ്റ മത്സ്യത്തൊഴിലാളി മരിച്ചു. പുതുക്കുറിച്ചി സ്വദേശി നൗഫലാണ് മരിച്ചത്. ഇന്ന് രാവിലെയാണ് അപകടമുണ്ടായത്.
അഴിമുഖം കടക്കവേയാണ് ഇയാൾക്ക് വള്ളത്തിലിടിച്ച് പരിക്കേറ്റത്. ഗുരുതരമായി പരിക്കേറ്റ ഉടനെ മെഡിക്കൽ കോളേജിൽ എത്തിച്ചെങ്കിലും ജീവൻ രക്ഷിക്കാനായില്ല. ഉൾക്കടലിൽ തിരയിൽപ്പെട്ട് വള്ളം കുലുങ്ങി വള്ളത്തിലുണ്ടായിരുന്ന ഇരുമ്പ് കമ്പി തലയിൽ വീണതാണ് മത്സ്യത്തൊഴിലാളിയുടെ മരണകാരണം.
മത്സ്യ ബന്ധനത്തിൽ ഏർപ്പെട്ടിരുന്ന പുതുക്കുറിച്ചി സ്വദേശി ഷാജഹാന്റെ ഉടമസ്ഥതയിലുള്ള വള്ളം ശക്തമായ തിരയടിയിൽ പെടുകയായിരുന്നു. വള്ളത്തിൽ ആകെ 38 മത്സ്യത്തൊഴിലാളികളാണ് ഉണ്ടായിരുന്നത്. മറൈൻ എൻഫോഴ്‌സ്മെന്റ് ആണ് വിവരം നൽകിയത്.
