ലോസ് ഏഞ്ചലസ്: കോസ്‌മെറ്റിക് സർജറിക്ക് പിന്നാലെ മരണത്തിന് കീഴടങ്ങി അർജന്റീനിയൻ നടി ജാക്വലിൻ കാരിയേരി. പ്ലാസ്റ്റിക് സർജറിക്ക് ശേഷം ആശുപത്രിയിൽ ചികിത്സയിൽ കഴിയവേയാണ് 58-കാരി മരണപ്പെട്ടത്. അപ്രതീക്ഷിതമായി രക്തം കട്ട പിടിച്ചതോടെ ആരോഗ്യനില വഷളാവുകയും നടി മരണത്തിന് കീഴടങ്ങുകയുമായിരുന്നു.
ലാറ്റിൻ അമേരിക്കൻ സിനിമയിലെ നിറ സാന്നിധ്യമായിരുന്നു ജാക്വിലിൻ കാരിയേരി. മോഡലിംഗ്, നാടകം, സിനിമ എന്ന് തുടങ്ങി സർവ മേഖലയിലും ജാക്വിലിന്റെ കൈകളിൽ ഭദ്രമായിരുന്നു. പ്ലാസ്റ്റിക് സർജറിക്ക് പിന്നാലെ മരണപ്പെടുന്ന സംഭവങ്ങൾ വർദ്ധിച്ച് വരികയാണ്. അടുത്തിടെ കന്നട നടി ചേതന രാജ് മരണപ്പെട്ടിരുന്നു. കൊഴുപ്പ് കുറയ്‌ക്കാനായായിരുന്നു നടി പ്ലാസ്റ്റിക് സർജറി നടത്തിയത്. ഇതിന് പിന്നാലെ ആരോഗ്യനില വഷളായി മരണപ്പെട്ടു.
കോസ്‌മെറ്റിക് സർജറികൾ മൂലമുള്ള സങ്കീർണതകൾ താരങ്ങൾക്കിടയിൽ സാധാരണമാണ് യൗവനം നിലനിർത്തുന്നതിനോ അല്ലെങ്കിൽ ഭംഗി വർദ്ധിപ്പിക്കുന്നതിനോ വേണ്ടിയാണ് മിക്കവരും സൗന്ദര്യ വർദ്ധക ശസ്ത്രക്രിയകൾക്ക് വിധേയരാകുന്നത്. ശസ്ത്രക്രിയയ്‌ക്ക് പിന്നാലെ പാർശ്വഫലങ്ങൾ മൂലമാണ് മരണം വരെ സംഭവിക്കുന്നതെന്നാണ് വിലയിരുത്തൽ. ഇതിൽ അമിതമായി ഉപയോഗിക്കുന്ന രാസവസ്തുക്കളാണ് മരണം വിളിച്ചു വരുത്തുന്നത്. ഹൃദയമിടിപ്പ് പെട്ടെന്ന് കുറയുക, ശ്വാസംമുട്ടൽ, നെഞ്ചുവേദന, രക്തം കട്ടപിടിക്കൽ, രക്തസ്രാവം എന്നിവയ്‌ക്ക് കാരണമാകുകയും ആരോഗ്യനില പെട്ടെന്ന് തന്നെ വഷളാവുകയും ചെയ്യുന്നു. പിന്നാലെ മരണത്തിന് കീഴടങ്ങുകയാണ് പതിവ്.
