ഭാരത് ഗൗരവ് ട്രെയിനിന് സമാനമായ രീതിയിൽ ടൂർ പാക്കേജുമായി എത്തിയിരിക്കുകയാണ് ഇന്ത്യൻ റെയിൽവേയുടെ സഹകരണത്തോടെ പ്രവർത്തിക്കുന്ന സ്വകാര്യ റെയിൽ ടൂർ ഏജൻസിയായ ഉല റെയിൽ. എല്ലാവരുടെയും സ്വപ്ന ഇടങ്ങളായ ഗോവ, രാജസ്ഥാൻ എന്നിവിടങ്ങളിലേക്കാണ് പാക്കേജ് പ്രഖ്യാപിച്ചിരിക്കുന്നത്. ഒപ്പം ഗുജറാത്തിലെ സ്റ്റാച്യു ഓഫ് യൂണിറ്റി സന്ദർശിക്കാനും അവസരമുണ്ടാകും.
‘റോയൽ രാജസ്ഥാൻ വിത്ത് ഗോവ ആന്റ് സ്റ്റാച്യു ഓഫ് യൂണിറ്റി’ എന്നാണ് പാക്കേജിന്റെ പേര്. 11 രാത്രിയും 12 പകലുമാണ് പാക്കേജ് നീണ്ടുനിൽക്കുക. നവംബർ 16-ന് കൊച്ചുവേളിയിൽ നിന്നാണ് ായത്ര ആരംഭിക്കുക. കൊല്ലം, കോട്ടയം, എറണാകുളം, തൃശൂർ, ഷൊർണൂർ, കോഴിക്കോട്, കണ്ണൂർ, കാസർകോട് എന്നീ സ്റ്റേഷനുകളിൽ ട്രെയിന് സ്റ്റോപ്പുണ്ടാകും.
മൂന്ന് ദിവസത്തെ യാത്രയ്‌ക്കൊടുവിൽ 19-ാം തീയതിയാകും രാജസ്ഥാനിലെ ജോധ്പൂരിലെത്തുക. ഉമൈദ് ഭവൻ മ്യൂസിയം, ജസ്വന്ത് താഡാ, മെഹ്റാൻഗഡ് കോട്ട എന്നിവിടങ്ങൾ സന്ദർശിക്കും. 20-ന് പുലർച്ചെ ജോധ്പൂരിൽ നിന്ന് ജയ്സാൽമീറിലേക്കാകും യാത്ര പോകുക. പത്വോൺ കി ഹവേലി എന്നിവയും മരുഭൂമിയും കാണാം. രാത്രി ജയ്സാൽമീറിൽ നിന്ന് ബികനേറിന് തിരിക്കും. 21-ന് ജുനാഗഡ് കോട്ട, കർനി മാതാ ക്ഷേത്രം, എന്നിവിടങ്ങൾ സന്ദർശിച്ച് രാത്രിയോടെ ജയ്പൂരിൽ എത്തും. 22-ന് ജയ്പൂരിൽ അമേർ ഫോർട്ട്, ജന്തർ മന്ദർ, സിറ്റി പാലസ്, ഹവാ മഹൽ എന്നിവിടങ്ങളും സന്ദർശിക്കാം.
23-ന് ജയ്പൂരിൽ നിന്നും അജ്മീറിലെത്തി അജ്മീർ ഷരീഫ് ദർഗകണ്ട് ഉദയ്പൂരിലെത്തും. പിറ്റേന്ന് ഉദയ്പൂർ സിറ്റി പാലസ്,ജഗദീഷ് ടെമ്പിൾ, മ്യൂസിയം, സഹേലിയോംകിബാരി, പ്രതാപ് മെമ്മോറിയൽ, എന്നിവിടങ്ങൾ സന്ദർശിക്കാവുന്നതാണ്. 25-ാം തിയതി ഏകതാ നഗറിലെത്തും. സ്റ്റ്യാച്യൂ ഓഫ് യൂണിറ്റി ആണ് ഈ ദിവസം കാണുന്നത്. അന്ന് തന്നെ മടക്ക യാത്ര ആരംഭിക്കും. 26-ാം തീയതി യാത്രയ്‌ക്ക് പിന്നാലെ 27-ന് രാത്രി കൊച്ചുവേളിയിൽ തിരികെയെത്തും.
ഫസ്റ്റ് എസി, സെക്കൻഡ് എസി, തേർഡ് എസി, സ്ലീപ്പർ എന്നീ ക്ലാസുകളിൽ യാത്ര ചെയ്യാവുന്നതാണ്. കംഫർട്ട് കാറ്റഗറിയിൽ ഫസ്റ്റ് ക്ലാസിൽ 52,200 രൂപയാണ് നിരക്ക്. സ്റ്റാൻഡേർഡ് കാറ്റഗറിയിൽ സെക്കൻഡ് എസിയിൽ 44,800 രൂപയാണ് നിരക്ക്. എക്കണോമി കാറ്റഗറിയിൽ 3 എസി ക്ലാസിൽ 32,250 രൂപയുമാണ് നിരക്ക്. 21,600 രൂപയാണ് സ്ലീപ്പർ ക്ലാസ് യാത്രയുടെ നിരക്ക്.
