സ്വീഡൻ: അമേരിക്കൻ സാമ്പത്തിക ശസ്ത്രജ്ഞ ക്ലോഡിയ ഗോൾഡിന് ഈ വർഷത്തെ സാമ്പത്തിക നൊബേൽ പുരസ്‌കാരം. വനിതകളുടെ തൊഴിൽ മേഖലയെകുറിച്ചും അതിന്റെ മുന്നേറ്റങ്ങളെക്കുറിച്ചുമുള്ള പഠനങ്ങൾക്കാണ് പുരസ്‌കാരം. എഴുപത്തി ഏഴാം വയസ്സിലാണ് ക്ലോഡിയ നൊബേൽ പുരസ്‌കാരത്തിന് അർഹയായിരിക്കുന്നത്. സാമ്പത്തിക ശാസ്ത്ര മേഖലയിൽ ഏറ്റവും വലിയ പുരസ്‌കാരമാണിത്. പുരസ്‌കാരം ലഭിക്കുന്ന 93-ാമത്തെ ശാസ്ത്രജ്ഞയാണ് ക്ലോഡിയ. 1946-ൽ ജനിച്ച ഇവർ ഹർവാർഡ് യുണിവേഴ്‌സിറ്റി പ്രൊഫസറാണ്. 1972-ൽ ചിക്കാഗോ യൂണിവേഴ്‌സിറ്റിയിൽ നിന്നും പിഎച്ച്ഡിയും കേംബ്രിഡ്ജിൽ നിന്ന് എം.എയും പൂർത്തിയാക്കി.
പ്രശസ്ത ശാസ്ത്രജ്ഞനായ ആൽഫ്രഡ് നൊബേലിന്റെ സ്മരണാർത്ഥം നൽകുന്ന പുരസ്‌കാരമാണ് നൊബേൽ പുരസ്‌കാരം. 1969നും 2022നും ഇടയിൽ 54 തവണയായി 92 പേരാണ് സാമ്പത്തിക നൊബേൽ പുരസ്‌കാരത്തിന് അർഹരായത്. സ്വെറജസ് റിസ്‌ക് ബാങ്ക് എന്നാണ് സാമ്പത്തിക ശാസ്ത്രത്തിനുള്ള നൊബേൽ പുരസ്‌കാരം അറിയപ്പെടുന്നത്.
സ്വെറിജസ് റിക്സ്ബാങ്കിന്റെ 300-ാം വാർഷികത്തോടനുബന്ധിച്ച് 1968-ൽ നൊബേൽ ഫൗണ്ടേഷന് സംഭാവന ലഭിച്ചിരുന്നു ഇതിന്റെ അടിസ്ഥാനത്തിലാണ് 1969 മുതൽ പുരസ്‌കാരം നൽകാൻ തുടങ്ങിയത്. റാഗ്‌നർ ഫ്രിഷ്, ജാൻ ടിൻബർഗൻ എന്നിവരാണ് സാമ്പത്തിക ശാസ്ത്രത്തിൽ ആദ്യ നൊബേൽ കരസ്ഥമാക്കിയത്.
നൊബേൽ പുരസ്‌കാരങ്ങളുടെ പെരുമാറ്റചട്ടങ്ങൾ പാലിച്ച് കൊണ്ട് സ്വീഡനിലെ സ്റ്റോക്ക്‌ഹോമിലെ റോയൽ സ്വീഡിഷ് അക്കാദമി ഓഫ് സയൻസസാണ് സാമ്പത്തിക ശാസ്ത്രത്തിനുള്ള പുരസ്‌കാരം നൽകുന്നത്.
