തിരുവനന്തപുരം: പത്തനംതിട്ട ജില്ലാ കളക്ടറായിരുന്ന ദിവ്യ.എസ്.അയ്യർ ഐഎഎസിനെ വിഴിഞ്ഞം പോർട്ട് എംഡിയായി നിയമിച്ചു. അദീല അബ്ദുള്ളയ്‌ക്ക് പകരമാണ് നിയമനം. വിഴിഞ്ഞം തുറമുഖത്തേക്ക് ആദ്യ കപ്പൽ എത്തുന്നതിന് മുമ്പായാണ് ചുമതലമാറ്റം.
ആറ് ജില്ലാ കളക്ടർമാർക്കാണ് മാറ്റമുണ്ടായിരുക്കുന്നത്. ആലപ്പുഴ കളക്ടറായിരുന്ന ഹരിത വി കുമാറിനെ മൈനിംഗ് ആന്റ് ജിയോളജി ഡയറക്ടറായി നിയോഗിച്ചു. ജോൺ വി. സാമുവലാണ് പുതിയ ആലപ്പുഴ ജില്ലാ കളക്ടർ. പത്തനംതിട്ട കളക്ടറായി എ.ഷിബുവിനെയും നിയോഗിച്ചു. സ്‌നേഹജ് കുമാറിനെ കോഴിക്കോട് കളക്ടറായും എൽ. ദേവിദാസിനെ കൊല്ലം കളക്ടറായും വി. ആർ. വിനോദിനെ മലപ്പുറം കളക്ടറായും നിയോഗിച്ചു. അരുൺ കെ.വിജയനാണ് പുതിയ കണ്ണൂർ ജില്ലാ കളക്ടർ.
വിഴിഞ്ഞം അന്താരാഷ്‌ട്ര തുറമുഖത്തിൽ ഈ മാസം 15ന് ആദ്യ ചരക്കുകപ്പൽ അടുക്കുമെന്നാണ് കരുതുന്നത്. തുറമുഖത്തിന് ആവശ്യമായ കൂറ്റൻ ക്രെയിനുകളുമായാണ് കപ്പൽ എത്തുന്നത്. 15ന് വൈകീട്ട് നാലിന് എത്തുന്ന കപ്പലിനെ വാട്ടർ സല്യൂട്ട് നൽകി സ്വീകരിക്കും. അടുത്ത മേയ് മാസത്തോടെ തുറമുഖം ആദ്യഘട്ട പ്രവർത്തനത്തിന് സജ്ജമാകും.
