അയോദ്ധ്യയിലെ രാമക്ഷേത്രത്തിന്റെ ശ്രീകോവിലിൽ പ്രതിഷ്ഠിക്കുന്ന രാംലല്ല വിഗ്രഹത്തിന്റെ നിർമ്മാണ പ്രവർത്തനങ്ങൾ അന്തിമ ഘട്ടത്തിലാണ്. പ്രമുഖ ശിൽപിയായ വിപിൻ ബദൗരിയയുടെ നേതൃത്വത്തിലാണ് രാംലല്ലയുടെ നിർമ്മാണം പുരോഗമിക്കുന്നത്. ദിവസവും 16 മണിക്കൂറിലധികമാണ് ബദൗരിയ വിഗ്രഹ നിർമ്മാണത്തിനായി ചെലവഴിച്ചത്. ജനുവരി 22-ന് ഭക്തർക്കായി ക്ഷേത്രസമുച്ചയം തുറന്ന് നൽകുമ്പോൾ ലോകജനങ്ങളുടെ ശ്രദ്ധാകേന്ദ്രമാകും രാംലല്ല എന്നതിൽ സംശയമില്ല. ഇതിന് പിന്നിൽ പ്രവർത്തിച്ചവരിൽ താനും ഉണ്ടെന്നതിൽ അതിയായ സന്തോഷമുണ്ടെന്ന് ബദൗരിയ പറഞ്ഞു.
1998-ലാണ് ബദൗരിയ കലമേഖലയിലേക്ക് തിരിഞ്ഞത്. പരമ്പരാഗത ഒഡീസി ശിൽപ വിദ്യകളിലൂടെയാണ് അദ്ദേഹം പരിശീലനം ആരംഭിച്ചത്. മരത്തടിയിലായിരുന്നു ആദ്യകാലത്ത് ബദൗരിയ കൊത്തുപണികൾ പഠിച്ചത്. തുടർന്ന് 2006-ൽ പരമ്പരാഗത ശിൽപ വിദ്യയിൽ മികവ് പുലർത്തിയ വിപിൻ ബദൗരിയ സ്വർണ മെഡൽ നേട്ടതോടെയാണ് ഫൈൻ ആർട്‌സിൽ ബിരുദം നേടിയത്. ബെംഗളൂരു സർവകലാശാലയിൽ നിന്ന് സമകാലിക ശിൽപവിദ്യയിൽ ബിരുദാനന്തര ബിരുദവും അദ്ദേഹം സ്വന്തമാക്കി. പിന്നീട് മുഴുവൻ സമയവും ശിൽപവിദ്യയിലായിരുന്നു ശ്രദ്ധ കേന്ദ്രീകരിച്ചിരുന്നത്. ദേവന്മാരുടെയും ദേവതകളുടെയും ശിൽപങ്ങൾ, തടി ശിൽപങ്ങൾ, കല്ല് കൊത്തുപണികൾ, ചുവർചിത്രങ്ങൾ, ഛായചിത്രങ്ങൾ എന്നിവ സൃഷ്ടിക്കുന്നതിൽ വിസ്മയം തീർക്കാൻ അദ്ദേഹത്തിനായി.
വിപിൻ ബദൗരിയയുടെ സൃഷ്ടികൾ നിരവധി ഇടങ്ങളിലാണ് പ്രശസ്തി നേടിയിട്ടുള്ളത്. ബെംഗളൂരുവിലെ സ്റ്റോൺ പാലസ് ഗ്രൗണ്ടിൽ നടന്ന വാർഷിക ശിൽപ പ്രദർശനം, ദക്ഷിണ കൊറിയയയിലെ ജെജു ദ്വീപിൽ നടന്ന പ്രശസ്തമായ ഡെൽഫിക് ഗെയിംസ് ശിൽപ മത്സരത്തിൽ ബദൗരിയയുടെ ചിത്രം മൂന്നാം സ്ഥാനം കരസ്ഥമാക്കി. 2011-ൽ നാഗ്പൂരിൽ നടന്ന 25-ാമത് അഖിലേന്ത്യ ശിൽപ പ്രദർശന മത്സരം തുടങ്ങി നിരവധി ശിൽപശാലകളിൽ ആഗോള തലത്തിൽ തന്നെ വിപിൻ ബദൗരിയയുടെ കലാസൃഷ്ടികൾ ശ്രദ്ധ നേടിയിട്ടുണ്ട്.
കൃഷ്ണശിലയിൽ ശ്രീരാമന്റെ വിഗ്രഹം സസൂക്ഷമാണ് നിർമ്മിക്കുന്നതെന്ന് അദ്ദേഹം പറഞ്ഞു. ദിവസത്തിൽ 16 മണിക്കൂറോളമാണ് ഇതിനായി പ്രവർത്തിക്കുന്നത്. ഗുരുനാഥനായ ഗണേഷ് ഭട്ടുമായി സഹകരിച്ചാണ് ജോലി ചെയ്യുന്നതെന്ന് അദ്ദേഹം കൂട്ടിച്ചേർത്തു. നിർമ്മാണ പ്രവർത്തനങ്ങൾക്കൊടുവിൽ രാംലല്ലയുടെ വിഗ്രഹം വിസ്മയിപ്പിക്കുമെന്നും അദ്ദേഹം ഉറപ്പുനൽകുന്നു.
ഒരു കൈയിൽ വില്ലും മറുകയ്യിൽ അമ്പുമേന്തി താമരയുടെ മുകളിൽ നിൽക്കുന്ന അഞ്ച് വയസുകാരനായ ശ്രീരാമനാണ് രാംലല്ല വിഗ്രഹം. 51 ഇഞ്ച് ഉയരമുള്ള പ്രതിമയിൽ ശ്രീരാമനുമായി ബന്ധപ്പെട്ട എല്ലാ അടയാളങ്ങളും കൊത്തിവെച്ചിട്ടുണ്ട്. കർണാടകയിൽ നിന്നുള്ള കറുത്ത കല്ലായ കൃഷ്ണശില ഉപയോഗിച്ചാണ് വിപിൻ ബദൗരിയ വിഗ്രഹം നിർമ്മിച്ചത്. കറുത്ത കല്ലിൽ നിർമ്മിച്ച വിഗ്രഹം ലോകത്തിലെ ഏറ്റവും വലുപ്പമേറിയതും മനോഹരവുമായ ശ്രീരാമ വിഗ്രഹമായിരിക്കും. കാഴ്ചക്കാരെ വിസ്മയിപ്പിക്കുന്നതാകും രാംലല്ല വിഗ്രഹമെന്ന് അദ്ദേഹം നേരത്തെ പറഞ്ഞിരുന്നു.
