ടെൽ അവീവ് : ഒക്ടോബർ ഏഴിലെ ഭീകരാക്രമണത്തിന് ഉത്തരവാദികളായ ഹമാസ് ഭീകരരെ വേട്ടയാടി ഉന്മൂലനം ചെയ്യാൻ പ്രത്യേക യൂണിറ്റ് രൂപീകരിച്ച് ഇസ്രയേൽ . ഇസ്രായേലി സുരക്ഷാ ഏജൻസികളായ മൊസാദും ഷിൻ ബെറ്റും ചേർന്നാണ് പുതിയ യൂണിറ്റ് സ്ഥാപിച്ചത് . പുതിയ യൂണിറ്റിന് ഒന്നാം ലോകമഹായുദ്ധ കാലത്തെ ജൂത ഭൂഗർഭ സംഘടനയായ “നിലി” യുടെ പേരായിരിക്കും നൽകുക. “ഇസ്രായേലിന്റെ നിത്യനായവൻ കള്ളം പറയുകയില്ല” എന്ന് വിവർത്തനം ചെയ്യുന്ന ഒരു എബ്രായ പദത്തിന്റെ ചുരുക്കപ്പേരാണിത്.
മൊസാദ് ഇസ്രായേലിന്റെ രഹസ്യാന്വേഷണ വിഭാഗമാണ്, ഷിൻ ബെറ്റ് രാജ്യത്തിന്റെ ആഭ്യന്തര സുരക്ഷാ സേവന വിഭാഗവുമാണ്.രണ്ടാഴ്ച മുമ്പ് തെക്കൻ ഇസ്രായേലിൽ നടന്ന ഭീകരാക്രമണങ്ങളിലും കര ആക്രമണത്തിലും ഉൾപ്പെട്ട എല്ലാ ഹമാസ് ഭീകരനെയും വേട്ടയാടി ഉന്മൂലനം ചെയ്യുക എന്ന സമർപ്പിത ദൗത്യം നിലിക്കുണ്ടാകും.
ഹമാസിന്റെ പ്രത്യേക കമാൻഡോ യൂണിറ്റ് നുഖ്ബയെ (“എലൈറ്റ്”) തകർക്കുന്നതിനാണ് പുതിയ യൂണിറ്റ്, നിലി പ്രത്യേകമായി സ്ഥാപിച്ചത്. ഒക്ടോബർ 7 ന്, ഈ നുഖ്ബ യൂണിറ്റിലെ ഭീകരർ, ഇസ്രായേലിലേക്ക് നുഴഞ്ഞുകയറി, കൂട്ടക്കൊലകളും ബലാത്സംഗങ്ങളും നടത്തി . 250-ലധികം ഇസ്രായേലികളെയും വിദേശികളെയും ഗാസയിലേക്ക് തട്ടിക്കൊണ്ടുപോയി. കരയിലൂടെയും കടലിലൂടെയും വായുവിലൂടെയും ഹമാസ് ഭീകരർ തെക്കൻ ഇസ്രായേലിനെ ആക്രമിച്ചു, 1400-ലധികം ആളുകൾ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു.
ഇസ്രയേലിലേക്ക് കടന്ന ഹമാസ് ഭീകരരെ ഇസ്രായേൽ സൈന്യം വധിച്ചെങ്കിലും മറ്റുള്ളവർക്ക് ഗാസ മുനമ്പിലേക്ക് ഒളിച്ചോടാൻ കഴിഞ്ഞു. അവരിൽ പലരും സാധാരണക്കാരെ തട്ടിക്കൊണ്ടുപോയി ബന്ദികളാക്കി . ഇസ്രായേലിലെ ഗാസ അതിർത്തിക്കടുത്തുള്ള കൂട്ടക്കൊലയ്‌ക്ക് ശേഷം ഗാസയിലേക്ക് തിരികെ പോയ ഹമാസ് ഭീകരരെ വേട്ടയാടാനുള്ള ഉത്തരവാദിത്തം ഇനി ഈ നിലി യൂണിറ്റിനായിരിക്കും.
നിലിയുടെ അംഗങ്ങൾ മറ്റ് കമാൻഡ് ആൻഡ് കൺട്രോൾ യൂണിറ്റുകളിൽ നിന്ന് സ്വതന്ത്രമായി പ്രവർത്തിക്കും. സ്‌ട്രൈക്ക് സെല്ലുകളെയും ഉയർന്ന റാങ്കിലുള്ള ഭീകരരെയും നിർവീര്യമാക്കുന്നതിലാണ് ആ യൂണിറ്റുകൾ ശ്രദ്ധ കേന്ദ്രീകരിക്കുന്നത്. മറുവശത്ത്, ഈ പ്രത്യേക ദൗത്യം വ്യത്യസ്തമാണ്, അതുകൊണ്ടാണ് നിലിയിൽ ഫീൽഡ് ഓപ്പറേറ്റർമാരും ഇന്റലിജൻസ് ഉദ്യോഗസ്ഥരും ഉൾപ്പെടുന്നത് .
ഇസ്രയേൽ കരസേന ആക്രമണം ശക്തമാക്കുന്ന വേളയിൽ, ഓരോ ഹമാസ് ഭീകരനും മരണത്തെ അഭിമുഖീകരിക്കുമെന്ന് ഇസ്രായേൽ മുന്നറിയിപ്പ് നൽകി. എങ്കിലും, ഒക്ടോബർ ഏഴിന് നടന്ന ആക്രമണത്തിന് പിന്നിൽ പ്രവർത്തിച്ച രണ്ട് പ്രതികൾ ഇസ്രയേലിന്റെ ഹിറ്റ് ലിസ്റ്റിൽ മുന്നിലാണ്. ഹമാസ് സൈനിക കമാൻഡർ മുഹമ്മദ് ഡീഫും രാഷ്‌ട്രീയ നേതാവ് യഹ്യ സിൻവാറുമാണ് അവർ.
ഹമാസിന്റെ സ്ഥാപക അംഗങ്ങളിൽ ഒരാളായിരുന്നു സിൻവാർ. 23 വർഷം ഇസ്രായേൽ ജയിലുകളിൽ ചെലവഴിച്ച സിൻവാർ അവിടെ നിന്ന് ഹീബ്രു പഠിച്ചു . എന്നാൽ 2011-ൽ ഫ്രഞ്ച്-ഇസ്രായേൽ സൈനികനായ ഗിലാദ് ഷാലിത്തിന്റെ മോചനത്തിനായി കൈമാറ്റം ചെയ്യപ്പെട്ട 1,100 പലസ്തീൻ തടവുകാരിൽ ഒരാളായിരുന്നു സിൻവാർ.
ഗാസയിലെ ഖാൻ യൂനിസ് അഭയാർത്ഥി ക്യാമ്പിലാണ് സിൻവാറും ഡീഫും ജനിച്ചത്. 2015ൽ ഇരുവരെയും അമേരിക്കയുടെ മോസ്റ്റ് വാണ്ടഡ് ഇന്റർനാഷണൽ തീവ്രവാദികളുടെ പട്ടികയിൽ ഉൾപ്പെടുത്തി.
