നവരാത്രി ആഘോഷ നിറവിലാണ് കൊല്ലൂർ മൂകാംബിക ക്ഷേത്രം. നവരാത്രി നാളിലെ ക്ഷേത്രത്തിലെ പ്രധാന ചടങ്ങായ ദേവിയുടെ രഥോത്സവം മഹാനവമി ദിവസമായ ഇന്ന് ഉച്ചയ്‌ക്ക് 12.30ന് നടക്കും.
വാഗ്‌ദേവതയായ ദേവി മൂകാംബികയുടെ അനുഗ്രഹം നേടാനും രഥോത്സവ ചടങ്ങിന് സാക്ഷ്യം വഹിക്കാനും ക്ഷേത്രം വലം ചെയ്യുന്ന രഥത്തിൽ നിന്നും വാരിയെറിയുന്ന നാണയത്തുട്ടുകൾ സ്വന്തമാക്കാനും വിദ്യാരംഭ ചടങ്ങുകൾക്കുമായി മലയാളികൾ ഉൾപ്പെടെ പതിനായിരക്കണക്കിന് ഭക്തരാണ് കൊല്ലൂരിലെത്തിയിരിക്കുന്നത്. ഇങ്ങനെ നാണയം ലഭിക്കുന്നവർക്ക് ഐശ്വര്യം കൈവരുമെന്നാണ് വിശ്വാസം.
പുഷ്പങ്ങൾ കൊണ്ട് അലങ്കരിച്ച രഥത്തിൽ മൂകാംബികാ ദേവിയെ എഴുന്നള്ളിച്ച് ക്ഷേത്രത്തിൽ പ്രദക്ഷിണം വെക്കുന്നതാണ് ചടങ്ങ്. പുഷ്പങ്ങൾ, പഴങ്ങൾ, പച്ചക്കറികൾ എന്നിവ കൊണ്ടാണ് പൂജാരിമാർ ദേവിയുടെ രഥത്തിന്റെ അലങ്കാരം ഒരുക്കുന്നത്. ക്ഷേത്രം തന്ത്രി നിത്യാനന്ദ അഡിഗയുടെ കാർമ്മികത്വത്തിലാണ് രഥോത്സവ ചടങ്ങുകൾ നടക്കുന്നത്.
വിജയദശമി ദിനമായ ചൊവ്വാഴ്ച ആയിരക്കണക്കിന് കുരുന്നുകൾ ദേവിയുടെ മുൻപിൽ ഹരിശ്രീ കുറിക്കും. പുലർച്ചെ 4 മണി മുതൽ തന്നെ വിദ്യാരംഭ ചടങ്ങുകൾ ആരംഭിക്കും. ക്ഷേത്രത്തിലെ സരസ്വതി മണ്ഡപത്തിൽ ഇരുപതോളം പുരോഹിതന്മാരുടെ കാർമികത്വത്തിലാണ് വിദ്യാരംഭ ചടങ്ങുകൾ നടക്കുക.
ദുർഗാഷ്ടമി നാളായ ഇന്നലെയും പ്രത്യേക പൂജകൾ ക്ഷേത്രത്തിൽ നടന്നു.
