വിവാദങ്ങള് ഒഴിയാത്ത പാകിസ്താന് ക്രിക്കറ്റ് ബോര്ഡിന് നേതൃമാറ്റം. ചെയര്മാന് സ്ഥാനത്ത് നിന്ന് വിവാദ നായകന് സാക്കാ അഷ്റഫ് തെറിച്ചേക്കും. ക്യാപ്റ്റന് ബാബറിന്റെ അടക്കം സ്വകാര്യ ചാറ്റുകള് പുറത്തുവിട്ട് പുലിവാല് പിടിച്ച അഷ്റഫിനെ പുറത്താക്കാന് വലിയ ചരടുവലികള് നടക്കേയാണ് അത് ക്ലൈമാകിസിലേക്ക് എത്തുന്നതായി വിവരങ്ങള് പുറത്തുവരുന്നത്.
പാകിസ്താന്റെ കാവല് പ്രധാനമന്ത്രി അന്വര് ഉള്ഹഖ് കാകര് മുന് നായകന് ഷാഹിദ് അഫ്രീദിയോട് സ്ഥാനം ഏറ്റെടുക്കാന് അഭ്യര്ത്ഥിച്ചെന്ന വിവരങ്ങള് പുറത്തുവന്നു. അഷ്റഫിന്റെ കാലാവധി പൂര്ത്തിയാകാനിരിക്കെയാണ് പൊടുന്നനെ ഉള്ള നീക്കം. കഴിഞ്ഞ ദിവസം അഷ്റഫിനെതിരെ രൂക്ഷ വിമര്ശനവുമായി അഫ്രീദി രംഗത്തെത്തിയിരുന്നു. ടീമിനെയും സെലക്ഷനെയു വിമര്ശിച്ച താരം അഷ്റഫ് തരംതാണ പ്രവൃത്തികളാണ് കാട്ടിക്കൂട്ടുന്നതെന്നും തുറന്നടിച്ചിരുന്നു.
അഫ്രീദിയെ നേരിട്ടു കണ്ട കാവല് പ്രധാനമന്ത്രി ഇതുമായി ബന്ധപ്പെട്ട് വിവിധ കാര്യങ്ങള് ചര്ച്ച ചെയ്തിട്ടുണ്ട്. തീരുമാനം ഉടനെ ഉണ്ടായേക്കും. ലോകകപ്പില് പാകിസ്താന് ടീം പുറത്താകലിന്റെ പടിവാതിലാണ്. ഇതിനെ തുടര്ന്ന് വലിയ പൊട്ടിത്തെറിയാണ് ബോര്ഡിലുണ്ടായത്. ചീഫ് സെലക്ടര് ഇന്സമാം അടുത്തിടെ രാജിവച്ചിരുന്നു.