തൃശൂർ: ബാറിലെത്തി ഭക്ഷണവും മദ്യവും കഴിച്ച് പണം നൽകാതെ കടന്നുകളഞ്ഞയാളെ തേടി സമൂഹമാദ്ധ്യമങ്ങളിൽ ബാർ ജീവനക്കാരന്റെ പോസ്റ്റ്. തൃശൂർ കാഞ്ഞാണിയിലെ സിംല ബാറിലെ ജീവനക്കാരൻ മജീദിനെയാണ് യുവാവ് മദ്യപിച്ച ശേഷം പണം നൽകാതെ കബളിപ്പിച്ചത്.
കഴിഞ്ഞ ദിവസമാണ് സംഭവം. മദ്യം ആവശ്യപ്പെട്ടാണ് യുവാവ് ബാറിലെത്തിയത്. ബാറിലെ ജീവനക്കാരനായ മജീദ് ആവശ്യത്തിന് മദ്യം വിളമ്പി. കഴിക്കാനായി ഒരു എഗ്ഗ് ചില്ലിയും ഓർഡർ ചെയ്തു. ഇതിനിടെ യുവാവ് കൂടുതൽ മദ്യം അകത്താക്കി. ഊണ് കഴിക്കാനുള്ള സമയം അടുത്തതോടെ മജീദ് മറ്റൊരു ജീവനക്കാരനെ ഏൽപ്പിച്ച് പോയി. തിരിച്ചു വന്നിട്ടും യുവാവ് എഴുന്നേറ്റ് പോയിട്ടില്ല. ബില്ല് കൊടുത്തപ്പോൾ കൂട്ടുകാർ ആരോ വരുമെന്നായിരുന്നു മറുപടി.
രാത്രി ഏഴ് മണിയായിട്ടും യുവാവ് പറഞ്ഞ ആരും എത്തിയില്ല. യുവാവിന്റെ കയ്യിൽ ഫോണോ സാധനങ്ങളോ ഉണ്ടായിരുന്നില്ല. കാശ് പിന്നീട് കൊണ്ട് വന്ന് തരാമെന്നായി യുവാവ്. കുന്നംകുളം കുരിശുപള്ളി സ്വദേശി ദേവൻ എന്ന വിലാസവും കൊടുത്തു. ബാറിൽ കൊടുക്കാനുള്ള 535 രൂപ അടുത്ത ദിവസം കൊണ്ട് തരാമെന്ന് പറഞ്ഞു. വിശ്വാസം വരാത്ത ബാർ ജീവനക്കാർ യുവാവ് ഒപ്പിട്ടു നൽകിയ കടലാസും പിടിച്ചുള്ള ഒരു ഫോട്ടോ എടുത്ത് വച്ചു. വിചാരിച്ചതു പോലെ സംഭവിച്ചു.
പോയ യുവാവ് പിന്നീട് പണവുമായി വന്നില്ല. യുവാവ് കഴിച്ച മദ്യത്തിന്റെ പണം ജീവനക്കാരന് സ്വന്തം കയ്യിൽ നിന്ന് ബാറിൽ അടക്കേണ്ടി വന്നു. ഈ യുവാവിനെ സൂക്ഷിക്കണമെന്നും കണ്ടു കിട്ടുന്നവർ അറിയിക്കണം എന്നും അഭ്യർത്ഥിച്ചാണ് മജീദ് സമൂഹമാദ്ധ്യമങ്ങളിൽ പോസ്റ്റിട്ടത്.
