പാലക്കാട്: മണ്ണാര്‍ക്കാട് കോട്ടോപ്പാടം മേഖലയില്‍ പേപ്പട്ടി ശല്യം രൂക്ഷം. കല്ലടി അബ്ദുഹാജി ഹൈസ്കൂളിൽ കുട്ടികള്‍ അടക്കം നിരവധി പേര്‍ക്ക് കടിയേറ്റു. ക്ലാസ്സിലെത്തിയ പേപ്പട്ടി ആറാം ക്ലാസ് വിദ്യാർത്ഥിയെ ആക്രമിച്ചു. ഒരു അദ്ധ്യാപകനും കടിയേറ്റു. അദ്ധ്യാപകരുടെ സമയോചിതമായ ഇടപെടലിലൂടെയാണ് കൂടുതൽ കുട്ടികൾ പേപ്പട്ടി ആക്രമണത്തിൽ നിന്നും രക്ഷപ്പെട്ടത്.
കഴിഞ്ഞ ദിവസം ഒരു ഇതര സംസ്ഥാന തൊഴിലാളിക്കും കടിയേറ്റിരുന്നു. സ്കൂളിന് പുറത്തുവച്ച് മറ്റൊരു കുട്ടിക്കും പേപ്പട്ടിയുടെ കടിയേറ്റിരുന്നു. പേപ്പട്ടി ശല്യം രൂക്ഷമായതിനെ തുടർന്ന് സ്കൂൾ അധികൃതർ ജില്ലാ വിദ്യാഭ്യാസ ഓഫീസർക്ക് പരാതി നൽകിയിരിക്കുകയാണ്.
