എറണാകുളം: കനത്ത മഴയോടൊപ്പമുണ്ടായ കാറ്റിൽ ബെവ്കോ ഔട്ട്‌ലെറ്റിൽ വൻ നാശനഷ്ടം. കാക്കനാട് ഇൻഫോപാർക്കിലെ ബെവ്കോ ഔട്ട്‌ലെറ്റിന്റെ പ്രീമിയം കൗണ്ടറിലാണ് നാശനഷ്ടം സംഭവിച്ചിരിക്കുന്നത്. മഴയോടൊപ്പം ആഞ്ഞുവീശിയ കാറ്റിൽ അലമാരയിലുണ്ടായിരുന്ന കുപ്പികൾ നിലംപതിച്ചു. ആയിരത്തിലധികം മദ്യ കുപ്പികളാണ് താഴെ വീണ് പൊട്ടിയിരിക്കുന്നത്.
കൊച്ചി നഗരത്തെ വെള്ളക്കെട്ടിലാക്കി ഇന്ന് വൈകിട്ടോടെയാണ് കനത്ത മഴയും കാറ്റുമുണ്ടായത്. കാറ്റിൽ ബെവ്കോ ഔട്ട്‌ലെറ്റിന്റെ ജനൽച്ചില്ലകൾ തകർന്ന് മദ്യം വച്ചിരുന്ന അലമാരയിൽ ചെന്ന് വീഴുകയായിരുന്നു. ഇതോടെ ഓരോ മദ്യകുപ്പികളായി താഴേയ്‌ക്ക് വീണു. കനത്ത മഴയിൽ നിരവധി നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. നിരവധി മരങ്ങൾ കടപുഴകി വീഴുകയും പോസ്റ്റുകൾക്ക് മറിഞ്ഞുവീണ് നിരവധി വാഹനങ്ങൾക്ക് കേടുപാടുകൾ സംഭവിക്കുകയും ചെയ്തിട്ടുണ്ട്. നിലവിൽ ആർക്കും ആളപായം സംഭവിച്ചിട്ടില്ല.
