തിരുവനന്തപുരം: ഫയർഫോഴ്‌സ് ജീവനക്കാരുമായി പോകുന്നതിനിടെ ബസിന്റെ ടയറുകൾ ഊരിത്തെറിച്ചു. ശബരിമല ഡ്യൂട്ടിക്ക് പോയ ബസിന്റെ ടയറുകൾ ഊരിത്തെറിച്ചത്. അപകട സമയത്ത് 32 ജീവനക്കാർ ബസിൽ ഉണ്ടായിരുന്നു. പുലർച്ചെ അഞ്ച് മണിയോടെ ആറ്റിങ്ങലിന് സമീപം ആലംകോട് വെച്ചായിരുന്നു അപകടം.
ബസിന്റെ പിൻവശത്തുള്ള രണ്ട് ടയറുകളാണ് ഊരിത്തെറിച്ചത്. 200- മീറ്ററോളം വാഹനം മുന്നോട്ട് പോയതിന് ശേഷം വലിയ ശബ്ദത്തോടെ വാഹനം നിൽക്കുകയായിരുന്നു. തിരുവനന്തപുരത്ത് നിന്ന് പുറപ്പെട്ട വാഹനം കൊല്ലത്ത് നിന്നും ജീവനക്കാരെ കയറ്റാൻ പോകുന്നതിനിടെയാണ് അപകടം സംഭവിച്ചത്.
അപകട സമയത്ത് ഊരിത്തെറിച്ച ഒരു ടയർ കണ്ടെത്താനായിട്ടില്ല. സംഘത്തിൽ യാത്രാ ചുമതലയുള്ള ഉദ്യോഗസ്ഥർ ആരും ഉണ്ടായിരുന്നില്ലെന്ന് ജീവനക്കാർ പറയുന്നു. അപകടം നടന്ന് മണിക്കൂറുകൾ കഴിഞ്ഞിട്ടും ഉദ്യോഗസ്ഥർ ആരും എത്തുകയോ പകരം വാഹനം ഒരുക്കുകയൊ ചെയ്തിട്ടില്ലെന്നും ആക്ഷേപമുണ്ട്.
