തിരുവനന്തപുരം: രാജ്യത്തും സംസ്ഥാനത്തിന്റെ വിവിധ ഭാഗങ്ങളിലും നടന്ന അക്രമ സംഭവങ്ങളുടെ പശ്ചാത്തലത്തിൽ ശബരിമലയിൽ അതീവ ജാഗ്രത പുലർത്തണമെന്ന് പോലീസ് റിപ്പോർട്ട്. ഭീകരരുടെ ആക്രമണത്തെയും അടിയന്തര സാഹചര്യങ്ങളെയും നേരിടാനും പ്രതിരോധിക്കാനും മാതൃകാ പ്രവർത്തന ചട്ടങ്ങൾ ശബരിമലയിൽ രൂപീകരിക്കണമെന്നും റിപ്പോർട്ടിൽ പറയുന്നു.
സംസ്ഥാനത്തിന് അകത്തും പുറത്തുമുള്ള ഭീകരവാദ സംഘടനകളിലെയും കമ്യൂണിസ്റ്റ് ഭീകര ഗ്രൂപ്പുകളിലെയും അംഗങ്ങൾ തീർത്ഥാടകരെന്ന പേരിൽ ശബരിമലയിൽ കടന്നു കയറാനുള്ള സാധ്യതയുണ്ട്. വഴിപാട് സാധനങ്ങളുടെ പേരിൽ ഇക്കൂട്ടർ സ്‌ഫോടക വസ്തുക്കളോ സ്‌ഫോടനത്തിനു സഹായിക്കുന്ന ഉപകരണങ്ങളോ സന്നിധാനത്തേക്ക് കടത്തും. ഇംപ്രൊവൈസ്ഡ് എക്‌സ്‌പ്ലോസീവ് ഡിവൈസ് (ഐഇഡി) ഉപയോഗിച്ച് സ്‌ഫോടനങ്ങൾ നടത്താൻ അറിയാവുന്നവരാണ് ഇതിൽ ഉൾപ്പെട്ടിരിക്കുന്നത്. വിശ്വാസികളെ വേദനിപ്പിക്കാതെയും ആചാരങ്ങളെ ലംഘിക്കാതെയും വേണം സംശയമുള്ളവരുടെ ഇരുമുടിക്കെട്ട് പരിശോധിക്കാൻ. സംശയമുള്ളതും ഉപേക്ഷിക്കപ്പെട്ടതുമായ വസ്തുക്കൾ ശ്രദ്ധയോടെ കൈകാര്യം ചെയ്യണം. ഇവയുടെ മേൽ ജാഗ്രത പുലർത്തണമെന്നും നിർേദ്ദശമുണ്ട്.
ഒക്ടോബറിൽ കളമശേരിയിൽ യഹോവ വിശ്വാസികളുടെ പ്രാർത്ഥനാ സ്ഥലത്ത് ഐഇഡി ഉപയോഗിച്ചായിരുന്നു സ്ഫോടനം നടത്തിയത്. തീരദേശം വഴി ആയുധങ്ങളും സ്‌ഫോടക വസ്തുക്കളും കടത്താൻ സാധ്യതയുള്ളതിനാൽ ജാഗ്രത പുലർത്തണമെന്നും റിപ്പോർട്ടിൽ പറയുന്നു. സന്നിധാനത്തെ ഹോട്ടലുകൾക്ക് തീപിടിക്കാൻ സാധ്യത ഏറെയാണെന്നും അനധികൃത സിലിണ്ടറുകൾ സൂക്ഷിക്കുന്നത് നിയന്ത്രിക്കണമെന്നും ശുപാർശയുണ്ട്.
അടുത്ത സീസണിലേക്കുള്ള നിർദേശങ്ങൾ:
അധികംവരുന്ന എൽപിജി സിലിണ്ടറുകൾ സന്നിധാനത്ത് സൂക്ഷിക്കുന്നത് നിയന്ത്രിക്കണം. എൽപിജി വിതരണം ദേവസ്വംബോർഡ് ഏറ്റെടുക്കണം. സിലിണ്ടറുകൾക്കായി കേന്ദ്രീകൃത സൂക്ഷിപ്പ് കേന്ദ്രം വേണം.
കേന്ദ്രീകൃത റജിസ്‌ട്രേഷൻ സംവിധാനം വേണം. മകരജ്യോതി, മണ്ഡലപൂജ എന്നീ അവസരങ്ങളിൽ റിസർവേഷൻ സംവിധാനം കൊണ്ടുവരണം. സന്നിധാനത്തുനിന്ന് വലിയരീതിയിൽ ആളുകളെ ഒഴിപ്പിക്കാൻ ബദൽ മാർഗം കണ്ടെത്തണം.
പമ്പയിൽനിന്ന് സാധനങ്ങൾ സന്നിധാനത്തേക്ക് എത്തിക്കുന്നതിന് റോപ്പ് വേ സംവിധാനം.
അടിയന്തര ഒഴിപ്പിക്കലിന് സന്നിധാനത്ത് ഹെലിപാഡ്
തിരക്കു നിയന്ത്രിക്കാൻ സന്നിധാനത്ത് കൂടുതൽ തുറന്ന സ്ഥലം ഉണ്ടാകണം.
