ന്യൂ ഡൽഹി : പാഞ്ചാജന്യം ഭാരതത്തിന്റെ ആഭിമുഖ്യത്തിൽ ഡൽഹിയിലെ മലയാള ഭാഷാ പ്രേമികൾ തുഞ്ചൻദിനം ആഘോഷിച്ചു.
മലയാള ഭാഷാ പിതാവായ തുഞ്ചത്ത് രാമാനുജൻ എഴുത്തച്ഛന്റെ ജന്മദിന (സിസംബർ 30) ആഘോഷങ്ങളുടെ ഭാഗമായുള്ള പരിപാടികൾ 29/12/2023 വെള്ളിയാഴ്ച ഉത്തംനഗറിൽ ആണ് സംഘടിപ്പിച്ചത്.
പാഞ്ചജന്യം ഭാരതം ദേശീയ ജോയിന്റ് സെക്രട്ടറി ശ്രീ ബിനു ഓ എസ്സിന്റെ അദ്ധ്യക്ഷതയിൽ ചേർന്ന ചടങ്ങിൽ ഹിന്ദുസ്ഥാന്‍ സമാചാര്‍ വാര്‍ത്താ ഏജന്‍സിയുടെ ദേശീയ ഭാഷാ സമ്മാന്‍ അവാര്‍ഡ് ജേതാവും കൊച്ചി അന്താരാഷ്‌ട്ര പുസ്തകോത്സവസമിതിയുടെ കെ. രാധാകൃഷ്ണൻ പുരസ്കാര ജേതാവുമായ ജന്മഭൂമി ഡെപ്യൂട്ടി എഡിറ്റര്‍ ശ്രീ കാവാലം ശശികുമാർ ഉത്ഘാടനവും മുഖ്യ പ്രഭാഷണവും നടത്തി.
മലയാള ഭാഷയുടെ പിതാവായ എഴുത്തച്ഛൻ സാംസ്കാരിക ആത്മീയ നവോത്ഥാനത്തിന്റെ ഉജ്ജ്വല മൂർത്തിയാണ്. മലയാള ഭാഷയുടെ മാത്രമല്ല, മലയാളക്കരയുടെയും മലയാളിയുടെയും നവോത്ഥാനത്തിന്റെ പരമാചാര്യൻ കൂടിയായ തുഞ്ചത്ത് എഴുത്തച്ഛന് ഇതര രാജ്യങ്ങളും സംസ്ഥാനങ്ങളും അവരവരുടെ ഭാഷാ- സാംസ്കാരിക- ആദ്ധ്യാത്മിക ആചാര്യന്മാർക്ക് നൽകുന്ന മാനാദരങ്ങൾക്ക് തുല്യമായ ആദരങ്ങൾ നൽകാൻ മടിക്കുന്നതായി കാണുന്നു. നമ്മുടെ സംസ്കാരത്തിൽ അഭിമാനിക്കാൻ നമുക്ക് എഴുത്തച്ഛന് ഇനിയും ഉന്നതമായ പരിഗണനകൾ നൽകേണ്ടതുണ്ട്. എഴുത്തച്ഛന്റെ സമാധി സ്ഥലമായ തിരൂരിൽ ആചാര്യന് ഉചിതമായ തരത്തിൽ പ്രതിമ സ്ഥാപിച്ച്‌ സ്മാരകം നിർമ്മിക്കാൻ സംസ്ഥാന സർക്കാർ ഉടൻ നടപടി കൈക്കൊള്ളണം എന്ന് യോഗം ആവശ്യപ്പെട്ടു.
മാതൃഭാരതി ദേശീയ ജോയിന്റ് സെക്രട്ടറി ശ്രീമതി സതി സുനിൽ സ്വാഗതവും പാഞ്ചജന്യം ഭാരതം ഉത്തം മേഖല സെക്രട്ടറി ശ്രീ കാർത്തിക് ദേവദാസ് നന്ദിയും രേഖപ്പെടുത്തി. തുടർന്ന് ഗുരുകുലം കലാഭാരതിയിലെ കുട്ടികൾ അവതരിപ്പിച്ച ഭജനയും നടന്നു.
