പെരുന്ന: സമുദായ ആചാര്യനും സാമൂഹ്യപരിഷ്‌കർത്താവുമായ മന്നത്ത് പത്മനാഭന്റെ 147-ാം ജയന്തി ആഘോഷിച്ച് കേരളം. ചങ്ങനാശേരി പെരുന്ന എൻഎസ്എസ് മന്നം നഗറിൽ നടന്ന സമ്മേളനം തെന്നല ബാലകൃഷ്ണപിള്ള ഉദ്ഘാടനം ചെയ്തു. മന്നം സമാധിയിലെത്തി വിവിധ രാഷ്‌ട്രീയ നേതാക്കൾ പുഷ്പാർച്ചന നടത്തി. രാവിലെ മുതൽ തന്നെ വിവിധ നേതാക്കൾ പെരുന്നയിലേക്ക് എത്തിയിരുന്നു. സമാധിയിൽ പുഷ്പാർച്ചന നടത്തിയതിന് ശേഷമായിരുന്നു പൊതുസമ്മേളനത്തിന് തുടക്കം കുറിച്ചത്.
മന്നം ജയന്തി സമ്മേളനത്തിനായി പെരുന്നയിലേക്ക് മുൻകാലങ്ങളിൽ എത്തിയിരുന്ന പലരും ഇപ്പോൾ എത്താറില്ലെന്ന് എൻഎസ്എസ് ജനറൽ സെക്രട്ടറി ജി. സുകുമാരൻ നായർ സമ്മേളനത്തിനിടെ ചൂണ്ടിക്കാട്ടി. പ്രസിഡന്റ് ഡോ. എം ശശികുമാർ സമ്മേളനത്തിന്റെ അദ്ധ്യക്ഷത വഹിച്ചു. കേന്ദ്രമന്ത്രി വി മരുളീധരൻ പെരുന്നയിലെത്തിയിരുന്നു. സമാധി സ്ഥലം സന്ദർശിച്ച അദ്ദേഹം പുഷ്പാർച്ചന നടത്തി. 60 താലൂക്ക് യൂണിയനിലെ കരയോഗങ്ങൾ, വനിതാ സമാജങ്ങൾ, ബാലസമാജങ്ങൾ എന്നിവയുടെ പ്രതിനിധികൾ സമ്മേളനത്തിൽ പങ്കെടുത്തിരുന്നു.
