ലക്ഷദ്വീപിന്റെ വിനോദ സഞ്ചാര സാദ്ധ്യതകൾക്ക് ഊർജ്ജം പകരാൻ പ്ലാൻ 2026 മായി ടാറ്റ ഗ്രൂപ്പ്. രാജ്യത്തെ ഏറ്റവും പാരമ്പര്യമുള്ള ബിസിനസ് സ്ഥാപനമാണ് ലക്ഷദ്വീപിന്റെ പുനരുജ്ജീവനത്തിനായുള്ള പദ്ധതി തയ്യാറാക്കിയിരിക്കുന്നത്.
ടാറ്റയുടെ 2026 ലെ ലക്ഷദ്വീപ്
ലക്ഷദ്വീപിലെ പ്രധാന ദ്വീപുകളായ സുഹേലിലും, കദ്മത്തിലും ടാറ്റ ഗ്രൂപ്പിന്റെ രണ്ട് ആഡംബര റിസോർട്ടുകൾ 2026-ൽ തുറക്കും. 2023 ജനുവരിയിലാണ് ടാറ്റ ഗ്രൂപ്പിന്റെ അനുബന്ധ സ്ഥാപനമായ ഇന്ത്യൻ ഹോട്ടൽസ് കമ്പനി (IHCL) ലക്ഷദ്വീപിൽ രണ്ട് താജ് ബ്രാൻഡഡ് റിസോർട്ടുകൾ പ്രഖ്യാപിച്ചത്. കമ്പനി എംഡിയും സിഇഒയുമായ പുനിത് ചത്വാളാണ് ധാരണാപത്രത്തിൽ ഒപ്പുവച്ചത്.
സുഹേലിയിലും കദ്മത്തിലും ആഡംബര റിസോർട്ട്
36 ദ്വീപുകളുടെ കൂട്ടായ്മയായ ലക്ഷദ്വീപിൽ ബംഗാരം, അഗത്തി, കദ്മത്ത്, മിനിക്കോയ്, കവരത്തി, സുഹേലി തുടങ്ങി നിരവധി പ്രശസ്തമായ വിനോദസഞ്ചാര കേന്ദ്രങ്ങളുണ്ട്. ഇന്ത്യയിലെ ഏറ്റവും മനോഹരമായ ഡൈവിംഗ് സെന്ററുകളിലൊന്നാണ് കദ്മത്ത്. സുഹേലിയിലെ ബീച്ചിൽ നിർമിക്കുന്ന റിസോർട്ടിൽ 60 വില്ലകളും 50 വാട്ടർ വില്ലകളും ഉൾപ്പെടെ 110 മുറികളുണ്ടാകുമെന്ന് ടാറ്റയുടെ ഇന്ത്യൻ ഹോട്ടൽസ് കമ്പനി അറിയിച്ചു. കദ്മത്ത് റിസോർട്ടിൽ 75 ബീച്ച് സൈഡ് വില്ലകളും 35 വാട്ടർ വില്ലകളും ഉൾപ്പെടും.
പ്രധാനമന്ത്രി നരേന്ദ്ര മോദിയുടെ ലക്ഷദ്വീപ് സന്ദർശനത്തിന് ശേഷവും മാലദ്വീപ് വിവാദങ്ങളുടെ പശ്ചാത്തലത്തിലും സമൂഹ മാദ്ധ്യമങ്ങളിൽ തരംഗമായിരിക്കുകയാണ് ഈ കൊച്ചു പ്രദേശം. സമൂഹ മാദ്ധ്യമങ്ങളിൽ തരംഗമായി മാറിയിരിക്കുകയാണ് ‘ചലോ ലക്ഷദ്വീപ്’ ക്യാമ്പയിൻ. ഗൂഗിൾ സെർച്ചിൽ 3400 ശതമാനം വർദ്ധനവാണ് ഏതാനും ദിവസങ്ങൾക്കുള്ളിൽ ദ്വീപ് സമൂഹത്തിനുണ്ടായത്.
