പത്തനംതിട്ട: ഗാനഗന്ധർവൻ യേശുദാസിന്റെ ജന്മനക്ഷത്ര നാളിൽ തിരുവിതാംകൂർ ദേവസ്വം ബോർഡിന്റെ വക ശബരിമലയിൽ പ്രത്യേക വഴിപാടുകളും നെയ്യഭിഷേകവും നടത്തും. ദേവസ്വം ബോർഡ് പ്രസിഡന്റ് പ്രശാന്താണ് ഇക്കര്യം അറിയിച്ചത്. ജനുവരി 12 നാണ് (വെള്ളി) യേശുദാസിന്റെ ജന്മനക്ഷത്രമായ ഉത്രാടം നാൾ. അന്നേ ദിവസം രാവിലെ അദ്ദേഹത്തിന്റെ പേരിൽ ഗണപതിഹോമവും സഹസ്രനാമാർച്ചനയും ശനിദോഷനിവാരണത്തിനായി നീരാഞ്ജനവും നടത്തും. കൂടാതെ അദ്ദേഹത്തിന്റെ പേരിൽ നെയ്യഭിഷേകവും നടത്തും.
ജന്മനക്ഷത്ര നാളിൽ നടത്തുന്ന വഴിപാടുകളുടെ പ്രസാദം അമേരിക്കയിൽ താസമസിക്കുന്ന യേശുദാസിന് എത്തിച്ചുകൊടുക്കുമെന്ന് ദേവസ്വം ബോർഡ് പ്രസിഡന്റ് അറിയിച്ചു. ഇന്ന് 84-ാം പിറന്നാൾ ആഘോഷിക്കുന്ന യേശുദാസിന് ജന്മദിനാശംസകളും ദേവസ്വം ബോർഡ് പ്രസിഡന്റ് നേർന്നു.
യുഎസിലെ ടെക്‌സസിലെ സ്വവസതിയിലാണ് യേശുദാസ് 84-ാം ജന്മദിനം ആഘോഷിക്കുന്നത്. കേരളത്തിൽ പലയിടങ്ങളിലായി സംഗീത ഗ്രൂപ്പുകളും സാംസ്‌കാരിക സംഘടനകളും അദ്ദേഹത്തിന്റെ ഗാനങ്ങൾ അവതരിപ്പിച്ച് ശതാഭിഷേകം ആഘോഷിച്ചു. ഇഷ്ടദേവതയായ മൂകാംബിക ദേവിക്ക് ജന്മദിനത്തോടനുബന്ധിച്ച് പ്രത്യേക പൂജകൾ നടന്നു. കൂടാതെ ഫോർട്ട് കൊച്ചിയിലെ ജന്മഗൃഹമായ ദ ഹൗസ് ഓഫ് യേശുദാസിൽ ആഘോഷം സംഘടിപ്പിച്ചിരുന്നു.
