ഭാരതീയരുടെ പ്രധാന ആഹാരമാണ് ചോറ്. ഒരു നേരം ചോറ് കഴിക്കാതെ കടന്നു പോകുന്നത് പോലും പലർക്കും ചിന്തിക്കാൻ സാധിക്കില്ല. പല തരത്തിലുള്ള അരികളാണ് വിപണിയിലുള്ളത്. ഇതിൽ ഏത് അരിയായിരിക്കും മികച്ചത് എന്ന ചോദ്യത്തിന് ഉത്തരം നൽകിയിരിക്കുകയാണ് ജനപ്രിയ ഭക്ഷണ, ട്രാവൽ ഗൈഡായ ടേസ്റ്റ് അറ്റ്ലസ്. ലോകത്തിലെ മികച്ച അരിയായി ടേസ്റ്റ് അറ്റ്ലസിന്റെ പട്ടികയിൽ ഒന്നാം സ്ഥാനം കരസ്ഥമാക്കിയിരിക്കുകയാണ് ഇന്ത്യയുടെ സ്വന്തം ബസ്മതി അരി. ടേസ്റ്റ് അറ്റ്ലസിന്റെ 2023-24 പുരസ്കാരദാന ചടങ്ങിലാണ് ബസ്മതി അരിയെ ലോകത്തിലെ മികച്ച അരിയായി തിരഞ്ഞെടുത്തത്.
View this post on Instagram
ഇന്ത്യയിൽ കൃഷി ചെയ്തു വരുന്ന നീണ്ട തരത്തിലുള്ള നെല്ലിനമാണ് ബസ്മതി അരി. ഇത് വളരെയധികം സ്വാദുള്ളതും സ്വർണ നിറത്തോടു കൂടിയതുമാണ്. പാചകം ചെയ്യുമ്പോൾ പരസ്പരം ഒട്ടിപിടിക്കാതെ വേറിട്ട് നിൽക്കുന്നു. പാചകത്തിനു ശേഷം ഇതിലേക്ക് സോസോ കറികളോ ഒഴിച്ചാലും ഇത് പരസ്പരം ഒട്ടിപിടിക്കുന്നില്ലെന്നതാണ് മറ്റു അരികളിൽ നിന്നും ബസ്മതിയെ വ്യത്യസ്തമാക്കുന്നതെന്ന് ടേസ്റ്റ് അറ്റ്ലസ് സമൂഹ മാദ്ധ്യമമായ ഇൻസ്റ്റഗ്രാമിൽ കുറിച്ചു. ബസ്മതി അരിക്ക് പിന്നാലെ ഇറ്റലിയിലെ അർബോറിയോ അരിയും പോർച്ചുഗലിലെ കരോളിനോ അരിയും യഥാക്രമം രണ്ടും മൂന്നും സ്ഥാനങ്ങളിലുണ്ട്. സ്പെയിന്റെയും ജപ്പാനിന്റെയും അരികളാണ് പിന്നീട് പട്ടികയിൽ സ്ഥാനം പിടിച്ചിരിക്കുന്നത്.
