എറണാകുളം: തിരുവിതാംകൂർ ദേവസ്വം കമ്മീഷണറായി സിപിഎം നേതാവിനെ നിയമിച്ച സംഭവത്തിൽ സർക്കാരിന് തിരിച്ചടി. ഇടതു സംഘടന നേതാവായ സി.എൻ.രാമന്റെ നിയമനം ഹൈക്കോടതി റദ്ദാക്കി. ഹൈക്കോടതിയോട് ആലോചിക്കാതെ നിയമനം നടത്തിയെന്ന് ചൂണ്ടിക്കാട്ടിയാണു നടപടി. സി.എൻ.രാമന് മതിയായ യോഗ്യതയില്ലെന്നും വിരമിക്കൽ ആനുകൂല്യമടക്കം നൽകരുതെന്നും കോടതി വ്യക്തമാക്കി.
തിരുവിതാംകൂർ ദേവസ്വം കമ്മീഷണറായി കഴിഞ്ഞ ഡിസംബർ 14-നാണ് സി.എൻ രാമൻ ചുമതലയേറ്റത്. പിന്നാലെ തൽസ്ഥാനത്ത് നിന്ന് ഇയാളെ മറ്റണമെന്ന് ആവശ്യപ്പെട്ടുള്ള ഹർജി ഹൈക്കോടതിയിൽ എത്തിയിരുന്നു. ഇന്ന് വിരമിക്കാനിരിക്കെയാണ് സി.എൻ. രാമന്റെ നിയമനം റദ്ദാക്കി ഹൈക്കോടതി ഉത്തരവിറക്കിയത്.
ശബരിമല തീർത്ഥാടനകാലത്ത് ദേവസ്വം ബോർഡുമായി ബന്ധപ്പെട്ട കേസുകൾ എല്ലാ ദിവസവും കോടതിക്ക് മുന്നിലെത്തിയിരുന്നു. ഇതിനിടയിലാണ് സർക്കാർ ചട്ടം ലംഘിച്ചുള്ള നിയമനം നടത്തിയത്. തിരുവിതാംകൂർ എംപ്ലോയി ഫെഡറേഷന്റെ സംസ്ഥാന പ്രസിഡന്റായിരുന്നു സി.എൻ. രാമൻ.
