ന്യൂഡൽഹി: കേന്ദ്ര ബജറ്റിൽ കായികരംഗത്തെ രാജ്യത്തിന്റെ നേട്ടങ്ങളെണ്ണി പറഞ്ഞ് ധനകാര്യ മന്ത്രി നിർമ്മല സീതാരാമൻ. യുവാക്കൾ കായികമേഖലയിൽ മുന്നേറുന്നതിൽ രാജ്യം അഭിമാനം കൊള്ളുന്നു. രാജ്യത്തെ കായികതാരങ്ങൾക്ക് കേന്ദ്രസർക്കാർ നൽകുന്നത് മികച്ച പിന്തുണയാണ്. കായികമേഖലയ്‌ക്ക് രാജ്യം നൽകുന്ന പിന്തുണ എത്രത്തോളമുണ്ടെന്ന് സമീപകാലത്തെ പ്രകടനം വിലയിരുത്തിയാൽ മനസിലാകുമെന്നും കേന്ദ്രമന്ത്രി പറഞ്ഞു.
2023 ലെ ഹാങ്‌ചോ ഏഷ്യൻ ഗെയിംസിലും ഏഷ്യൻ പാരാ ഗെയിംസിലും എക്കാലത്തേയും ഉയർന്ന മെഡൽ വേട്ടയാണ് രാജ്യം നടത്തിയത്. കായിക മേഖലയിലെ മുന്നേറ്റത്തെയാണിത് പ്രതിഫലിപ്പിക്കുന്നത്. ചെസിൽ റാങ്കിംഗിൽ പ്രജ്ഞാനന്ദ ഒന്നാമതെത്തി. ചെസ് ലോകകപ്പിൽ മാഗ്‌നസ് കാൾസണെതിരെ ശക്തമായ പോരാട്ടമാണ് പ്രജ്ഞാനന്ദ കാഴ്ച വച്ചത്. രാജ്യത്ത് 2010-ൽ 20-ലധികം ചെസ് ഗ്രാൻഡ്മാസ്റ്റർമാരാണ് ഉണ്ടായിരുന്നത്. എന്നാൽ ഇന്ന് ഗ്രാൻഡ് മാസ്റ്റർമാരുടെ എണ്ണം 80-ലധികമായി ഉയർന്നെന്നും കേന്ദ്രമന്ത്രി പറഞ്ഞു.
രണ്ടാം മോദി സർക്കാരിന്റെ അവസാന ബജറ്റാണ് ധനമന്ത്രി പാർലമെന്റിൽ അവതരിപ്പിക്കുന്നത്. ഇത് ആറാം തവണയാണ് നിർമ്മലാ സീതാരാമൻ ബജറ്റ് അവതരിപ്പിക്കുന്നത്. അധികാരത്തിലേറുന്ന പുതിയ സർക്കാർ ജൂലൈയിൽ സമ്പൂർണ ബജറ്റ് അവതരിപ്പിക്കും.
