മുംബൈ: ലതാ മങ്കേഷ്‌കറിന്റെ സ്മരണാർത്ഥം മുംബൈയിൽ സ്ഥാപിക്കുന്ന സംഗീത കോളേജിനായി കോടികൾ വകയിരുത്തി മഹാരാഷ്ട്ര സർക്കാർ. മുംബൈ സർവ്വകലാശാലയുടെ കലീന ക്യാമ്പസിലാണ് 210.5 കോടി രൂപ ചെലവിൽ സംഗീത കോളേജ് സ്ഥാപിക്കുന്നത്.
ഭാരതരത്‌ന ലതാ ദീനാനാഥ് മങ്കേഷ്‌കർ ഇന്റർനാഷണൽ കോളേജ് ഓഫ് മ്യൂസിക് ആൻഡ് മ്യൂസിയം എന്നാണ് കോളേജിന് പേര് നൽകിയിരിക്കുന്നത്. നാളെ മുഖ്യമന്ത്രി ഏക്‌നാഥ് ഷിൻഡെ തറക്കല്ലിടും. മൂന്നുവർഷത്തിനകം കോളേജിന്റെ പണി പൂർത്തിയാകുമെന്നാണ് പ്രതീക്ഷിക്കുന്നത്.
ഡിപ്ലോമ, ഡിഗ്രി കോഴ്സുകളായിരിക്കും ഇവിടെ നടത്തുക. 2022 ജനുവരിയിലാണ് കോളേജ് കലീന ക്യാമ്പസിൽ സ്ഥാപിക്കുമെന്ന് പ്രഖ്യാപിച്ചത്. എന്നാൽ നിർമ്മാണ പ്രവർത്തനങ്ങൾക്കായി തുക അനുവദിച്ചിരുന്നില്ല. കോളേജിന്റെ മാതൃക രൂപകൽപന ചെയ്യുന്നതിനായി സർക്കാർ മത്സരം സംഘടിപ്പിച്ചിരുന്നു. മങ്കേഷ്‌കർ കുടുംബത്തിന്റെ അഭിപ്രായംകൂടി ചോദിച്ചറിഞ്ഞ ശേഷം, ഇതിൽ നിന്ന് തിരഞ്ഞെടുക്കുന്ന മാതൃകയിലായിരിക്കും കോളേജിന്റെ നിർമ്മാണം.
