ഇംഗ്ലണ്ടിനെതിരായ അവസാന മൂന്ന് ടെസ്റ്റുകൾക്കുള്ള ഇന്ത്യൻ സ്‌ക്വാഡ് പ്രഖ്യാപിച്ചപ്പോൾ ടീമിലേക്ക് ക്ഷണിക്കപ്പെട്ട സർപ്രൈസ് പേസറാണ് ആകാശ് ദീപ്. ആവേശ് ഖാന് പകരക്കാരനായാണ് ആകാശ് ടീമിലെത്തിയത്. ബംഗാളിനായി ആഭ്യന്തര ക്രിക്കറ്റിൽ മികച്ച പ്രകടനം കാഴ്ച വയ്‌ക്കുന്ന താരം ബൗളിംഗ് ഓൾറൗണ്ടറാണ്.
1996 ഡിസംബർ 15ന് ബിഹാറിലെ ഡെഹ്രിയിലാണ് താരത്തിന്റെ ജനനം. അച്ഛനിൽ നിന്ന് പ്രോത്സാഹനം ഇല്ലാതിരുന്നെങ്കിലും അമ്മാവൻ മികച്ച പിന്തുണയാണ് നൽകിയത്. ബീഹാറിൽ നിന്ന് ബംഗാളിലേക്ക് മാറാൻ ആകാശിനെ പ്രേരിപ്പിച്ചതും അമ്മാവനാണ്. ആഭ്യന്തര ക്രിക്കറ്റിൽ ബംഗാളിനായി 29 മത്സരങ്ങൾ കളിച്ച താരം 103 വിക്കറ്റുകൾ വീഴ്‌ത്തുകയും 418 റൺസ് സ്വന്തമാക്കുകയും ചെയ്തിട്ടുണ്ട്. ഐപിഎല്ലിൽ റോയൽ ചലഞ്ചേഴ്സ് ബാംഗ്ലൂരിന്റെ താരമാണ് ആകാശ്. 2022ൽ 20 ലക്ഷം രൂപയ്‌ക്കാണ് താരത്തെ ആർസിബി ടീമിലെടുത്തത്. ടീമിനായി 7 മത്സരങ്ങളിൽ നിന്ന് 6 വിക്കറ്റുകൾ വീഴ്‌ത്തിയിട്ടുണ്ട്.
ഇംഗ്ലണ്ട് ലയൺസിനെതിരായ പരമ്പരയിൽ ആകാശ് ദീപ് ഇന്ത്യ ‘എ’ ടീമിന്റെ ഭാഗമായിരുന്നു. മദ്ധ്യപ്രദേശിനായി രഞ്ജി ട്രോഫി മത്സരങ്ങളിൽ പങ്കെടുക്കാനായി ആവേശ് ഖാൻ പോയതോടെയാണ് സെലക്ടർമാരുടെ കണ്ണുകളിൽ ആകാശിന്റെ പേര് പതിഞ്ഞത്.
