ചെന്നൈ: അപകീർത്തികരമായ പരാമർശങ്ങൾ നടത്തിയ അണ്ണാഡിഎംകെ സേലം മുൻ വെസ്റ്റ് യൂണിയൻ സെക്രട്ടറി എ.വി രാജുവിനെതിരെ നിയമനടപടി സ്വീകരിക്കാനൊരുങ്ങി നടി തൃഷ. 2017ൽ അണ്ണാഡിഎംകെ പാർട്ടിക്കുള്ളിൽ നടന്ന ചേരിപ്പോരുമായി ബന്ധപ്പെട്ട പ്രസ്താവനകളാണ് അടുത്തിടെ രാജു പരാമർശിച്ചത്. ഇതിൽ ചേരിപ്പോരിനെ തുടർന്ന് കൂവത്തൂരിലെ റിസോർട്ടിലേക്ക് മാറ്റിയ എംഎൽഎമാരുടെ വിരുന്നിലേക്ക് നടിമാരെ എത്തിച്ചിരുന്നുവെന്നും തൃഷയുടെ പേര് പറഞ്ഞ് ഇവർ 25 ലക്ഷം രൂപ വാങ്ങിയെന്നും രാജു ആരോപിച്ചിരുന്നു. ഇതിനെതിരെയാണ് നടപടി സ്വീകരിക്കാൻ നടി തയ്യാറായിരിക്കുന്നത്.
തന്നെ മനപൂർവ്വം അപകീർത്തിപ്പെടുത്താൻ ശ്രമിക്കുകയാണെന്ന് തൃഷ സമൂഹമാദ്ധ്യമത്തിലൂടെ തുറന്നടിച്ചു. ചീപ്പ് പബ്ലിസിറ്റിയ്‌ക്ക് വേണ്ടി ഏതു വിധത്തിലും തരം താഴാൻ ശ്രമിക്കുന്നവരെ കാണുമ്പോൾ അറപ്പുളവാകുന്നുവെന്നും നടി കുറിച്ചു. രാജുവിനെതിരെ പരാതിപ്പെടുമെന്നും തൃഷ വ്യക്തമാക്കി.
