ബെംഗളൂരു : വസ്ത്രത്തിന്റെ പേരിൽ മെട്രോയിൽ യാത്ര ചെയ്യാൻ എത്തിയ കർഷകനെ തടഞ്ഞ സുരക്ഷ ഉദ്യോഗസ്ഥനെ ബെംഗളൂരു മെട്രോ റെയിൽ കോർപറേഷൻ പിരിച്ചുവിട്ടു.
രാജാജിനഗർ മെട്രോ സ്റ്റേഷനിലാണു സംഭവം. ഷർട്ടും മുണ്ടും തലയിൽ ചുമടുമായി എത്തിയ കർഷകൻ പ്ലാറ്റ്ഫോമിലേക്കു കടക്കാൻ ശ്രമിക്കവെയാണ് സുരക്ഷ ഉദ്യോഗസ്ഥൻ തടഞ്ഞത്.ക്യുവിൽ നിന്ന് മാറി നിൽക്കാൻ ആവശ്യപ്പെട്ട ഉദ്യോഗസ്ഥൻ കാരണം വ്യക്തമാക്കിയില്ല.
സുരക്ഷാ ഭീഷണി ഉയർത്തുന്ന വസ്തുക്കളൊന്നും കർഷകന്റെ കൈയിൽ ഉണ്ടായിരുന്നില്ല . തുടർന്ന് വേഷത്തിന്റെ പേരിൽ മാറ്റിനിർത്തിയത് തികച്ചും അനീതിയാണെന്നു പലരും ചൂണ്ടിക്കാണിച്ചു. സംഭവത്തിന്റെ വീഡിയോ പ്രചരിച്ചതോടെ ബിഎംആർസിക്ക് എതിരെ പ്രതിഷേധവും ചർച്ചകളും ശക്തമായി. തുടർന്നാണ് സുരക്ഷാ ഉദ്യോഗസ്ഥനെ പിരിച്ചുവിട്ടത്.
