മലയാളി താരം സന്ദീപ് വാര്യർ ഗുജറാത്ത് ടൈറ്റൻസിൽ. പരിക്കേറ്റ് സീസൺ നഷ്ടമായ മുഹമ്മദ് ഷമിക്ക് പകരക്കാരനായിട്ടാണ് താരത്തിന് ഗുജറാത്ത് ടീമിൽ ഇടംലഭിച്ചത്. ദിൽഷൻ മധുശങ്കയ്‌ക്ക് പകരക്കാരനായി മുംബൈ ഇന്ത്യൻസ് ദക്ഷിണാഫ്രിക്കൻ താരം ക്വേന മഫാകയെയും ടീമിലെത്തിച്ചിട്ടുണ്ട്.
ഫാസ്റ്റ് ബൗളറായ സന്ദീപ് കഴിഞ്ഞ വർഷം മുംബൈ ഇന്ത്യൻസിൽ ഉണ്ടായിരുന്നെങ്കിലും ഒരു മത്സരം പോലും കളിച്ചിരുന്നില്ല. മുമ്പ് റോയൽ ചലഞ്ചേഴ്‌സ് ബെംഗളൂരു, കൊൽക്കത്ത നൈറ്റ് റേഡേഴ്‌സ് എന്നീ ഫ്രാഞ്ചൈസികളുടെ ഭാഗമായിരുന്ന താരം ഇതുവരെ അഞ്ച് ഐപിഎൽ മത്സരങ്ങൾ കളിച്ചിട്ടുണ്ട്. അടിസ്ഥാന വിലയായ 50 ലക്ഷത്തിനാണ് സന്ദീപിനെ ഗുജറാത്ത് ടീമിലെത്തിച്ചിരിക്കുന്നത്.
ഏകദിന ലോകകപ്പിനിടെ കണങ്കാലിന് പരിക്കേറ്റ ഷമി ലണ്ടനിലെ ആശുപത്രിയിലെ ശസ്ത്രക്രിയക്ക് ശേഷം ഇപ്പോൾ വിശ്രമത്തിലാണ്. താരം നിലവിൽ ബിസിസിഐ മെഡിക്കൽ ടീമിന്റെ നിരീക്ഷണത്തിലാണ്.
