ബെംഗളൂരു: സോഷ്യൽ മീഡിയ ഇൻഫ്‌ളൂവൻസറും ബിഗ് ബോസ് മത്സരാർത്ഥിയുമായിരുന്ന സോനു ശ്രീനിവാസ് ഗൗഡയെ പോലീസ് അറസ്റ്റ് ചെയ്തു. മക്കളില്ലാത്ത താരം അടുത്തിടെ ഒരു കുഞ്ഞിനെ ദത്തെടുത്തിരുന്നു. എന്നാൽ കൃത്യമായ നടപടി ക്രമങ്ങൾ പാലിച്ചല്ല ഇവർ കുഞ്ഞിനെ ദത്തെടുത്തതെന്ന തരത്തിൽ ലഭിച്ച പരാതിയെ തുടർന്നായിരുന്നു അറസ്റ്റ്.
ശിശുക്ഷേമ സമിതിയിലെ ഒരു മുതിർന്ന ഉദ്യോഗസ്ഥൻ നൽകിയ പരാതിയുടെ അടിസ്ഥാനത്തിലാണ് നടപടി. റായ്ച്ചൂരിൽ നിന്നാണ് സോനു എട്ട് വയസുകാരിയെ ദത്തെടുത്തത്. കുട്ടിക്കൊപ്പം ഇവർ സോഷ്യൽ മീഡിയ പ്ലാറ്റ്‌ഫോമുകളിൽ നിരവധി റീലുകൾ പോസ്റ്റ് ചെയ്തിട്ടുണ്ടെന്നും പരാതിയിൽ പറയുന്നു. തങ്ങൾക്ക് പരാതി ലഭിച്ചതിന്റെ അടിസ്ഥാനത്തിലാണ് സോനുവിനെ അറസ്റ്റ് ചെയ്തത്. കേസിൽ അന്വേഷണം പുരോഗമിക്കുകയാണെന്നും പൊലീസ് പറഞ്ഞു.
താൻ ഒരു പെൺകുട്ടിയെ ദത്തെടുത്തു എന്ന് അറിയിച്ചുകൊണ്ട് സോനു കഴിഞ്ഞ ദിവസം ഒരു വീഡിയോ പങ്കുവച്ചിരുന്നു. ഈ സംഭവത്തിൽ യുവതി നിരവധി ട്രോളുകളും നേരിട്ടിരുന്നു. എന്നാൽ സോനു കുട്ടിയെ ദത്തെടുത്തത് സഹതാപവും താരപരിവേഷവും നേടാനായിരുന്നു എന്ന് ആരോപിച്ചാണ് ശിശുക്ഷേമ സമിതിയിലെ ഉദ്യോഗസ്ഥർ പൊലീസിൽ പരാതി നൽകിയത്.
