ന്യൂഡൽഹി: ആത്മനിർഭര ഭാരതമെന്ന പ്രധാനമന്ത്രി നരേന്ദ്രമോദിയുടെ ആഹ്വാനം ഏറ്റെടുത്ത് ഹോളി ആഘോഷിച്ച് ജനങ്ങൾ. പതിവായി ചൈനീസ് ഉൽപ്പന്നങ്ങൾ തിരഞ്ഞെടുത്തിരുന്നവർ പോലും ഇക്കുറി സ്വദേശി ഉൽപ്പന്നങ്ങൾക്കാണ് മുൻഗണന നൽകിയതെന്ന് കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ് ജനറൽ സെക്രട്ടറി പ്രവീൺ ഖണ്ഡേൽവാൾ പറഞ്ഞു. ഹോളിയോടനുബന്ധിച്ച് രാജ്യത്തുടനീളം 50,000 കോടിയുടെ വ്യാപാരം നടന്നിട്ടുണ്ടെന്നും അദ്ദേഹം കൂട്ടിച്ചേർത്തു.
ഇക്കുറി വിപണിയിൽ ചൈനീസ് ഉൽപ്പന്നങ്ങൾക്ക് കാര്യമായ വിൽപന ഉണ്ടായിരുന്നില്ലെന്ന് ഖണ്ഡേൽവാൾ പറഞ്ഞു. എടുത്തു പറയേണ്ടത് രാജ്യത്തെ ജനങ്ങൾ ചൈനീസ് ഉത്പന്നങ്ങൾ ഉപേക്ഷിക്കാൻ തുടങ്ങിയിരിക്കുന്നുവെന്നതാണ്. മുമ്പ് വില കുറഞ്ഞ ചൈനീസ് ഉത്പന്നങ്ങൾ ആവശ്യപ്പെട്ടിരുന്ന ജനങ്ങൾ ഇന്ന് തദ്ദേശീയമായി നിർമ്മിച്ച മികച്ച ഉത്പന്നങ്ങൾ തിരഞ്ഞെടുക്കാൻ ശ്രമിക്കുന്നു.” അദ്ദേഹം കൂട്ടിച്ചേർത്തു.
പ്രധാനമന്ത്രി നരേന്ദ്രമോദിയുടെ ആത്മനിർഭര ഭാരതമെന്ന സന്ദേശം ജനങ്ങൾ ഇതിനോടകം ഏറ്റെടുത്തു. ചൈനീസ് ഉത്പന്നങ്ങൾ നിർത്തലാക്കുന്നതിനായി ഡൽഹിയിൽ കാമ്പയിനുകൾ സംഘടിപ്പിച്ചിരുന്നു. അത് ജനങ്ങൾ ഇപ്പോൾ ഏറ്റെടുത്തിയിരിക്കുന്നുവെന്നും അദ്ദേഹം കൂട്ടിച്ചേർത്തു. രാജ്യം നിറങ്ങളുടെ ഉത്സവമായ ഹോളി ആഘോഷിക്കുന്നതിനായി മറ്റ് രാജ്യത്തെ ഉത്പന്നങ്ങൾ മാറ്റി നിർത്തി നമ്മുടെ രാജ്യത്തിൽ തന്നെ നിർമ്മിച്ച ഉത്പന്നങ്ങൾ വാങ്ങുന്നതിൽ സന്തോഷമുണ്ടെന്നും അദ്ദേഹം വ്യക്തമാക്കി.
