ലക്നൗ: അയോദ്ധ്യാ രാമക്ഷേത്രം ഇത്തവണ മഹത്തായ ഹോളി ആഘോഷത്തിന് സാക്ഷ്യം വഹിക്കുമെന്ന് രാമക്ഷേത്രത്തിലെ മുഖ്യ പുരോഹിതൻ ആചാര്യ സത്യേന്ദ്ര ദാസ്. ഇത്തവണ നടക്കുന്ന ഹോളി ആഘോഷം അതിമനോഹരമായിരിക്കുമെന്നും ഭഗവാൻ ശ്രീരാമനോടുള്ള ആദര സൂചകമായാണ് ഇത്തവണ ഹോളി ആഘോഷിക്കുന്നതെന്നും അദ്ദേഹം പറഞ്ഞു. ആഘോഷത്തെ കുറിച്ച് മാദ്ധ്യമപ്രവർത്തകരോട് സംസാരിക്കുകയായിരുന്നു ക്ഷേത്ര പുരോഹിതൻ.
പ്രാണപ്രതിഷ്ഠയ്ക്ക് ശേഷം അയോദ്ധ്യയിലേക്ക് ലക്ഷക്കണക്കിന് ഭക്തരാണ് ദിനംപ്രതിയെത്തുന്നത്. ഈ വർഷത്തെ ഹോളി ആഘോഷം അതി ഗംഭീരമായിരിക്കും. പ്രാണപ്രതിഷ്ഠയ്ക്ക് ശേഷം ക്ഷേത്രത്തിലെത്തിയ ഭക്തജനത്തിരക്ക് കണ്ട് ഞങ്ങൾ അതിശയിച്ചിരുന്നു. അയോദ്ധ്യയിലെ ഹോളി ആഘോഷം എല്ലാവരെയും അത്ഭുതപ്പെടുത്തും. എല്ലാവരും ഈ ഹോളി ആഘോഷത്തിന് വേണ്ടി കാത്തിരിക്കുകയാണ്. ഹോളിയോടനുബന്ധിച്ച് വിവിധ മധുര പലഹാരങ്ങളോടൊപ്പം പല വർണ പൊടികളും ബാലകരാമന് സമർപ്പിക്കും. ഭക്തർക്ക് പ്രത്യേക പ്രസാദങ്ങളും വിതരണം ചെയ്യും- ആചാര്യ സത്യേന്ദ്ര ദാസ് പറഞ്ഞു.
രാജ്യം വളരെ ആവേശത്തോടെ ആഘോഷിക്കുന്ന പരാമ്പരാഗത ഉത്സവമാണ് ഹോളി. മധുര പലഹാരങ്ങൾ പങ്കിടുന്നതും ഹോളി ആഘോഷത്തിന്റെ മറ്റൊരു പ്രത്യേകതയാണ്. മനുഷ്യർക്കിടയിലുള്ള സൗഹാർദ്ദത്തിന്റെയും ഒരുമയുടെയും അടയാളമാണ് ഹോളി ആഘോഷം.
