തീർത്തും വ്യത്യസ്തമായ കഥാപാത്രങ്ങൾ തിരഞ്ഞെടുക്കുകയും പരീക്ഷണ ചിത്രങ്ങളിൽ ഏറ്റവും കൂടുതൽ അഭിനയിക്കുകയും ചെയ്തിട്ടുള്ള നടനാണ് അക്ഷയ് കുമാർ. സമീപകാലത്ത് അഭിമുഖീകരിക്കേണ്ടി വന്ന തുടർച്ചയായ പരാജയങ്ങളെക്കുറിച്ച് ഇപ്പോൾ സംസാരിച്ചിരിക്കുകയാണ് നടൻ. ‘ബഡേ മിയാൻ ഛോട്ടേ മിയാൻ’ എന്ന സിനിമയുടെ ട്രെയിലർ ലോഞ്ചിനിടെയായിരുന്നു അക്ഷയ് കുമാർ മനുസുതുറന്നത്.
വിജയിക്കുമെന്ന ശുഭപ്രതീക്ഷയോടെയാണ് ഓരോ സിനിമകളും തിരഞ്ഞെടുക്കുന്നതെങ്കിലും ബോക്സ് ഓഫീസ് തന്റെ കൈയിൽ നിൽക്കുന്നതല്ലെന്ന് അക്ഷയ് കുമാർ പറയുന്നു.
“എല്ലാവിധത്തിലുള്ള സിനിമകൾ പരീക്ഷിക്കാനും ശ്രമം നടത്തിയിട്ടുണ്ട്. ഏതെങ്കിലും ഒരു പ്രത്യേക തരത്തിലുള്ള ചിത്രങ്ങൾ മാത്രം ചെയ്യാൻ ശ്രമിക്കാറില്ല. ഒരു ടൈപ്പ് സിനിമ ചെയ്താൽ അടുത്തത് മറ്റൊരു ടൈപ്പ് സിനിമയാകാൻ കഴിവതും നോക്കും. വിജയിച്ചാലും പരാജയപ്പെട്ടാലും കരിയർ തുടങ്ങിയ കാലം മുതൽ ഇങ്ങനെ സിനിമ ചെയ്യാനാണ് ശീലിച്ചിട്ടുള്ളത്. അതിൽ നിന്ന് എന്നെ തടയാൻ ഇതുവരെ ഒന്നിനും കഴിഞ്ഞിട്ടില്ല. സാമൂഹ്യ പ്രധാന്യമുള്ള, നല്ല കണ്ടന്റ് നൽകുന്ന സിനിമകളും, കോമഡിയും ആക്ഷനും എല്ലാം ഞാൻ ചെയ്യും. ഈ രീതിയിൽ തന്നെ മുന്നോട്ട് പോകും.
ഏതെങ്കിലും ഒരു ജോണറിലുള്ള സിനിമ തന്നെ ചെയ്തോണ്ടിരുന്നാൽ എനിക്ക് വിരസത അനുഭവപ്പെടും. അതുകൊണ്ടാണ് എപ്പോഴും മാറ്റിപ്പിടിക്കുന്നത്. ഒരു ജോണറിൽ തന്നെ തുടർന്ന് പോകാൻ എനിക്ക് ഇഷ്ടമില്ല. പുതിയത് എന്തെങ്കിലും ചെയ്തുകൊണ്ടിരിക്കാനാണ് ഇഷ്ടം. ടോയ്‌ലെറ്റ്‌ ഏക് പ്രേം കഥ, എയർലിഫ്റ്റ്, റസ്റ്റോം എന്നീ സിനിമകളൊക്കെ ചെയ്തു, ചിലത് വിജയമാകും ചിലത് ആകില്ല. എന്റെ കരിയറിൽ 16 തുടർപരാജയങ്ങൾ സംഭവിച്ചിരുന്നു, പക്ഷെ ഞാൻ തളർന്നില്ല, സിനിമ ഉപേക്ഷിച്ചില്ല, അവിടെ തന്നെ നിന്നുകൊണ്ട് വീണ്ടും പരിശ്രമിച്ചു. അത് തുടരുക തന്നെ ചെയ്യും. – അക്ഷയ് കുമാർ പറഞ്ഞു.
