മലയാളത്തിന്റെ സ്വന്തം ഉണ്ണിമുകുന്ദൻ നായകനായി എത്തുന്ന ‘ജയ് ഗണേഷ്’ തിയേറ്ററുകളിൽ എത്തുന്നതിന്റെ ആവേശത്തിലാണ് മലയാളക്കര. മാർച്ച് 29ന് പുറത്തിറങ്ങിയ സിനിമയുടെ ട്രെയിലർ ഇരുകയ്യും നീട്ടിയാണ് പ്രേക്ഷകർ സ്വീകരിച്ചത്. വീൽചെയറിൽ ഇരുന്നുകൊണ്ടുള്ള ഉണ്ണിമുകുന്ദന്റെ പ്രകടനം തീർത്തും അവിസ്മരണീയമാകുമെന്നാണ് പുറത്തുവരുന്ന വിവരങ്ങൾ.
ദിവ്യാംഗനായി എത്തുന്ന ഉണ്ണിമുകുന്ദന്റെ പ്രകടനം തന്നെയാണ് ജയ് ഗണേഷ് എന്ന സിനിമയുടെ ആത്മാവ്. ചിത്രത്തിന്റെ ട്രെയിലർ ലോഞ്ചിന്റെ ദൃശ്യങ്ങളാണ് ഇപ്പോൾ ഏവരുടെയും ഹൃദയത്തിൽ സ്പർശിച്ചിരിക്കുന്നത്. തിരുവനന്തപുരത്ത് വച്ച് നടന്ന ട്രെയിലർ ലോഞ്ചിൽ സിനിമയുടെ അണിയപ്രവർത്തകർക്കൊപ്പം മുഖ്യതിഥികളായി എത്തിയത് ദിവ്യാംഗരായിരുന്നു.
ഒരു ദിവ്യാംഗനായി അഭിനയിച്ചപ്പോൾ ഉണ്ണിയുടെ വികാരം എന്തായിരുന്നുവെന്നും എന്തുകൊണ്ട് സ്‌റ്റേജുകളിൽ കയറാൻ സ്‌റ്റെപ്പുകൾ മാത്രം വയ്‌ക്കുന്നു, ഒരു റാംപ് വയ്‌ക്കുന്നത് ദിവ്യാംഗകർക്ക് കൂടി പ്രയോജനപ്പെടുമല്ലോയെന്ന ദിവ്യാംഗയുടെ ചോദ്യത്തിന് ഉണ്ണി നൽകിയ മറുപടിയാണ് ഇപ്പോൾ പ്രേക്ഷകപ്രീതി ഏറ്റുവാങ്ങുന്നത്. ദിവ്യാംഗയോട് ക്ഷമ പറഞ്ഞുകൊണ്ടാണ് ഉണ്ണി ചോദ്യത്തിനുള്ള മറുപടി നൽകിയത്.
തന്റെ ജീവിതത്തെ മാറ്റിമറിച്ച കഥാപാത്രം തന്നെയായിരുന്നു ജയ് ഗണേഷിൽ അവതരിപ്പിച്ചതെന്നും റാംപിന്റെ കാര്യം ചിന്തയിൽ നിന്ന് വിട്ടുപോയതിൽ ക്ഷമ ചോദിക്കുന്നുവെന്നും അദ്ദേഹം പറഞ്ഞു. ജയ്ഗണേഷിന്റെ വിജയാഘോഷത്തിൽ വേദിക്ക് താഴെയായി ഇരിക്കുന്ന എല്ലാ ദിവ്യാംഗരും അന്നേ ദിവസം വേദിയുടെ മുകളിൽ ഉണ്ടായിരിക്കുമെന്ന് ഉണ്ണി അവർക്ക് ഉറപ്പ് നൽകി. ചിത്രത്തിന്റെ വിജയാഘോഷത്തിന്റെ ഭാഗമായി 100 വീൽചെയർ വിതരണം ചെയ്യുമെന്നും ഉണ്ണിമുകുന്ദൻ അറിയിച്ചു. ദിവ്യാംഗരായ സഹോദരികളെ പൊന്നാട അണയിച്ചും സിനിമയുടെ അണിയപ്രവർത്തകർ ആദരിച്ചു.
ഏപ്രിൽ 11നാണ് ചിത്രം തിയേറ്ററുകളിൽ എത്തുന്നത്. രഞ്ജിത്ത് ശങ്കർ തിരക്കഥയെഴുതി സംവിധാനം ചെയ്യുന്ന ചിത്രമാണ് ജയ് ഗണേഷ്. മഹിമ നമ്പ്യാർ നായികയാവുന്ന ചിത്രത്തിൽ ഒരിടവേളക്ക് ശേഷം ജോമോളും അഭിനയിക്കുന്നു. ഉണ്ണി മുകുന്ദൻ ഫിലിംസും രഞ്ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേർന്നാണ് ചിത്രം നിർമ്മിക്കുന്നത്.
